رسالهِٔ نورڭ مسلكى، سائر طريقتلر، مسلكلر گبى مغلوب اولميه‌رق بلكه غلبه ايده‌رك پك چوق معنّدلرى ايمانه گتيرمه‌سى· پك چوق حادثاتڭ شهادتيله، بو عصرده بر معجزهِٔ معنويهِٔ قرآنيه اولديغنى إثبات ايدر. او دائره‌نڭ خارجنده، أكثريتله بو مملكتده و خصوصى و جزئى و يالڭز شخصى خدمت· ويا مغلوبانه پرده آلتنده ويا بدعه‌لره مسامحه صورتنده ويا تأويلات ايله بيڭ نوع تحريفات ايچنده خدمتِ دينيه ايديله‌بيلير، دييه حادثات بزه قناعت ويرمش.

مادام سزده بيوك بر همّت و قوّتلى بر ايمان وار· تام بر إخلاص و تام بر محويتله، ثباتكارانه رسالهِٔ نوره شاكرد اول. تا بيڭلر، بلكه يوز بيڭلر شاكردلرڭ شركتِ معنويهِٔ اخرويه‌لرينه حصّه‌دار اول. تا سنڭ خيرلرڭ، اييلكلرڭ جزئيتدن چيقوب كلّيلشسين، آخرتده تام كارلى بر تجارت اولسون.

سعيد النورسى

٭ ٭ ٭