سزى أسكى طلبه‌لرم و أسكى آرقداشلرم و قارداشم و برادرزاده‌م عبد المجيد و عبد الرحمانلر بيلديگمدن، بو محرم سرّى سزه آچدم.

أوت بن يگرمى درت ساعت أوّل حسّاسيتمله و أعصابمڭ رطوبتدن تأثيريله رحمت و ياغمورڭ گلمه‌سنى حسّ ايتديگم گبى، عينًا اويله ده· بن و كويم و ناحيه‌م، قرق درت سنه أوّل رسالهِٔ نورده‌كى رحمت ياغمورينى بر حسِّ قبل الوقوع ايله حسّ ايتمشز ديمكدر.

عموم قارداشلريمزه و همشيره‌لريمزه سلام و دعا ايدرز. دعالريڭزى رجا ايدرز.

سعيد النورسى

٭ ٭ ٭

بيوك بر مقامده بر قوماندان و أهمّيتلى بر ذاتڭ أهمّيتلى مكتوبنه مجبورى بر جوابدر

﴿بِاسْمِهِ سُبْحَانَهُ ٭ اَلسَّلَامُ عَلَيْكُمْ وَ رَحْمَةُ اللّٰه وَ بَرَكَاتُهُ﴾

عزيز، صدّيق قارداشم!

بِالمقابله بز ده رمضانڭزى تبريك ايدييورز. رؤيالريڭز پك چوق مباركدرلر. إن شاء اللّٰه، جنابِ حق سزى بيوك إحسانلره مظهر أيله‌يه‌جك، دييه بر إشارتدر.

بنجه بو زمانده أڭ بيوك بر إحسان، بر وظيفه، ايمانى قورتارمقدر، باشقه‌لرڭ ايماننه قوّت ويره‌جك بر صورتده چاليشمقدر. صاقين، بنلك و غروره مدار شيلردن چكڭ. تواضع، محويت و تركِ أنانيت، بو زمانده أهلِ حقيقته لازم و ألزمدر. چونكه بو عصرده أڭ بيوك تهلكه، بنلكدن و خودفروشلقدن ايلرى گلديگندن· أهلِ حق و حقيقت، محويتكارانه دائما قصورينى گورمك و نفسنى إتهام ايتمك گركدر. سزڭ گبى آغير شرائط ايچنده قهرمانجه‌سنه ايماننى و عبوديتنى محافظه ايتمه‌سى، بيوك بر مقامدر. سنڭ رؤيالريڭڭ بر تعبيرى ده، بو نقطه‌دن سنى تبشير ايتمكدر. رسالهِٔ نور أجزالرنده طريقت حقيقتنه دائر تلويحاتِ تسعه نامنده‌كى رساله‌يى ألده ايدوب باقڭز. هم ذاتڭز گبى متين و ايمانلى و حقيقتلى ذاتلر، رسالهِٔ نور دائره‌سنه گيريڭز. چونكه بو عصرده رسالهِٔ نور، بتون تهاجماته قارشى مغلوب اولمادى. أڭ معنّد دشمنلرينه ده، سربستيتنى رسمًا تسليم ايتديردى. حتّى ايكى سنه‌دن برى بيوك مقاماتلر و عدليه‌لر، تدقيقات نتيجه‌سنده رسالهِٔ نورڭ سربستيتنى تصديق و محرم و غيرِ محرم بتون أجزالرينى صاحبلرينه تسليمه قرار ويرديلر.