﴿بِاسْمِهِ سُبْحَانَهُ﴾

عزيز، صدّيق قارداشلرم!

بن پك قطعى بر صورتده و بيڭه ياقين تجربه‌لرم نتيجه‌سنده قطعى قناعتم گلمش و أكثر گونلرده حسّ ايدييورم كه: رسالهِٔ نورڭ خدمتنده بولونديغم گونده، خدمتڭ درجه‌سنه گوره قلبمده، بدنمده، دماغمده، معيشتمده بر إنكشاف، إنبساط، فرحلق، بركت گورويورم. و چوقلرى إعتراف ايدييور، "بز ده حسّ ايدييورز" ديرلر. حتّى سزه گچن سنه يازديغم گبى، بنم پك آز غدا ايله ياشاديغمڭ سرّى، او بركت ايمش.

هم مادام إمامِ شافعيدن روايت وار كه· خالص طلبهِٔ علومڭ رزقنه، بن كفالت ايده‌بيليرم ديمش. چونكه رزقلرنده وسعت و بركت اولور. مادام حقيقت بودر و مادام خالص طلبهِٔ علوم عنواننه رسالهِٔ نور شاكردلرى بو زمانده تام لياقت گوسترمشلر· ألبته شيمديكى آجلق و قحطه مقابل رسالهٔ نور خدمتنى بيراقمق و ضرورتِ معيشت عذريله، معيشت پشنده قوشمق يرينه أڭ ايى چاره، شكر و قناعت و رسالهٔ نور طلبه‌لگنه تام صاريلمقدر.

سعيد النورسى

٭ ٭ ٭

﴿بِاسْمِهِ سُبْحَانَهُ﴾

....

رسالهِٔ نور و اوندن تام درس آلان شاكردلرى، دگل دنيا سياستلرينه، بلكه بتون دنيايه قارشى ده رسالهِٔ نورى آلَت ايده‌مز و شيمدىيه قدر ده ايتمه‌مش. بز، أهلِ دنيانڭ دنيالرينه قاريشمييورز. بزدن ضرر توهّم ايتمك ديوانه‌لكدر.

أوّلا:

قرآن بزى سياستدن منع ايتمش· تا كه ألماس گبى حقيقتلرى، أهلِ دنيا نظرنده جام پارچه‌لرينه اينمه‌سين.