﴿بِاسْمِهِ سُبْحَانَهُ﴾

أى قارداشلرم!

بو زمانده خصوصًا بو صيره‌لرده، رسالهِٔ نور شاكردلرى تام بر متانت و تساند و دقّت ايتمگه مجبوردرلر. ِللّٰه الحمد إسپارطه و حواليسى قهرمانلرى دمير گبى متانت گوسترمه‌سيله، باشقه يرلره ده حسنِ مثال اولدى.

أى خسرو! تأثيرلى و گوزل مكتوبڭى آلدم. وظيفه‌ڭڭ باشنه گچمه‌ڭ، بزى فوق العاده مسرور ايتدى. بيڭلر صفالرله گلدڭ. سن، بو بر بچق سنه مادّى قلمڭ ايشله‌مديگندن مراق ايتمه. سنڭ يريڭه او كرامتلى قلمڭڭ يادگارى اولان معجزاتِ أحمديه‌نڭ برى ولاياتِ شرقيه‌ده فعّالانه گزييور. ديگر صوڭ يازديغڭ نسخه ده، إستانبولده سنڭ يرڭده چاليشوب، إن شاء اللّٰه فتوحات ياپار. سنڭ يازديغڭ معجزه‌لى ايكى قرآنِ عظيم الشانڭ بو حواليده خصوصًا رمضانِ شريفده سڭا قزانديردقلرى ثوابلر، تحسين و تبريكلرينى، إن شاء اللّٰه ياقينده طبعه گيرمه‌سيله، عالمِ إسلامدن سنڭ روحڭه ياغاجق رحمت دعالرينى دوشون، اللّٰهه شكر ايت.

سعيد النورسى

٭ ٭ ٭