بن ده او قارداشمه ديدم كه: "سن مبالغه ايدييورسڭ. بن اونى گورسه‌م، چوق مسئله‌لرده اونى إلزام ايده‌بيليرم. هم سن، بنم قدر حقيقى اونى سومييورسڭ. چونكه كائناتده‌كى علوملرى بيلير بر قطبِ أعظم صورتنده تخيّل ايتديگڭ بر ضياء الدين سَورسڭ· يعنى او عنوان ايله باغليسڭ، محبّت ايدرسڭ. أگر پردهِٔ غيب آچيلسه، حقيقتى گورولسه، سنڭ محبّتڭ يا زائل اولور وياخود درتده بريسنه اينر. فقط بن او ذاتِ مباركى، سنڭ گبى پك جدّى سَورم، تقدير ايدرم. چونكه سنّتِ سنيه دائره‌سنده، حقيقت مسلگنده، أهلِ ايمانه خالص و تأثيرلى و أهمّيتلى بر رهبردر. شخصى مقامى گورولسه، دگل گرى چكيلمك، واز گچمك، محبّتده نقصان اولمق· بِالعكس داها زياده حرمت و تقدير ايله باغلانه‌جغم. ديمك بن حقيقى بر ضياء الدينى، سن ده خيالى بر ضياء الدينى سَورسڭ."

بنم او قارداشم إنصافلى و مدقّق بر عالم اولديغى ايچون، بنم نقطهٔ نظريمى قبول ايدوب تقدير ايتدى.

أى رسالهِٔ نورڭ قيمتلى طلبه‌لرى و بندن داها بختيار و فداكار قارداشلرم! شخصيتم إعتباريله سزڭ زياده حسنِ ظنّڭز بلكه سزه ضرر ويرمز. فقط سزڭ گبى حقيقتبين ذاتلر وظيفه‌يه، خدمته باقوب، او نقطه‌ده باقماليسڭز. پرده آچيلسه، بنم باشدن آشاغىيه قدر قصوراتله آلوده ماهيتم گورونسه، بڭا آجييه‌جقسڭز. سزى قارداشلغمدن قاچيرمامق ايچون، قصوراتمى گيزلييورم.

سعيد النورسى

٭ ٭ ٭

﴿بِاسْمِهِ سُبْحَانَهُ﴾

بر هفته أوّلكى مكتوبڭزه قارشى حسنِ ظنّڭزى بر درجه جرح ايدن بنم جوابمڭ حكمتى شودر كه:

بو زمانده اويله فوق العاده حاكم جريانلر وار كه، هر شيئى كندى حسابنه آلديغى ايچون، فرضا حقيقى بكله‌نيلن و بر عصر صوڭره گله‌جك او ذات دخى بو زمانده گلسه ايدى، حركاتنى او جريانلره قاپديرمه‌مق ايچون سياست عالمنده‌كى وضعيتدن فراغت ايده‌جك و هدفنى دگيشديره‌جك دييه تخمين ايدييورم.