اون طوقوزنجى سوزڭ آخرنده بيان ايديلن قرآنده‌كى تكرارڭ أكثر حكمتلرى، رسالهٔ نورده دخى جريان ايدييور. بِالخاصّه ايكنجى حكمتى تام تامنه واردر. او حكمت شودر كه:

هركس هر وقت قرآنه محتاجدر. فقط هركس، هر وقت بتون قرآنى اوقومغه مقتدر اولاماز. فقط بر سوره‌يه غالبًا مقتدر اولور. اونڭ ايچون أڭ مهمّ مقاصدِ قرآنيه أكثر اوزون سوره‌لرده درج ايديله‌رك· هر بر سوره بر كوچك قرآن حكمنه گچمش. ديمك هيچ كيمسه‌يى محروم ايتمه‌مك ايچون حشر و توحيد و قصّهِٔ موسى گبى بعض مقصدلر تكرار ايديلمش. عين أهمّيتلى حكمت ايچوندر كه، بعض دفعه خبرم اولمادن، إختيارم و رضام اولماديغى حالده، بعض اينجه حقائقِ ايمانيه و قوّتلى حجّتلرى متعدّد رساله‌لرده تكرار ايديلمش. بن چوق حيرت ايدردم. نه‌دن اونلر بڭا اونوتديرلمش؟ صوڭره قطعى بر صورتده بيلدم كه: هركس بو زمانده رسالهِٔ نوره محتاجدر. فقط عمومنى ألده ايده‌مز. ألده ايتسه ده تمام اوقوياماز. فقط كوچك بر رسالهِٔ نور حكمنه گچمش بر رسالهِٔ جامعه‌يى ألده ايده‌بيلير. و أكثر وقتلرده محتاج اولديغى مسئله‌لرى اوندن اوقويه‌بيلير و غدا گبى هر زمان إحتياج تكرّر ايتديگى گبى، او ده مطالعه‌سنى تكرار ايدر.

سعيد النورسى

٭ ٭ ٭