ايكنجى مادّه:

مع التأسّف رسالهِٔ نورڭ ايمانسز و أمانسز جنّى و إنسى دشمنلرى، اونڭ چليك گبى متين قلعه‌لرينه، ألماس قلنجى گبى قوّتلى حجّتلرينه مقابله ايده‌مدكلرندن، چوق گيزلى دسيسه‌لر و خفى واسطه‌لرله، خبرلرى اولمادن يازانلرڭ شوقلرينى قيرمق و فتور ويرمك و يازيدن واز گچيرمك جهتنده شيطانجه‌سنه هجوم ايدوب ضربه وورويورلر. خصوصًا بوراده إحتياج پك چوق و يازيجيلر پك آز، دشمنلر چوق دقّتلى، قسمًا طلبه‌لرى مقاومتسز اولديغندن· بو مملكتى او نورلردن بر درجه محروم ايدييورلر.

بنم ايله حقيقت مشربنده صحبت ايتمك و گوروشمك ايسته‌ين آدم، هانگى رساله‌يى آچسه· بنم ايله دگل، خادمِ قرآن اولان استاديله گوروشور و حقائقِ ايمانيه‌دن ذوقله بر درس آلابيلير.

....

صبرينڭ مكتوبى يولده ايكن و گلمه‌دن أوّل او مكتوبڭ معنوى تأثيرى ايله بو آيتى

﴿اَوَمَنْ كَانَ مَيْتًا﴾

آيتيله برابر دوشونوركن بردن خاطريمه گلدى. رسالهِٔ نورڭ بو درجه قوّتلى إشاراتِ قرآنيه‌يه و شاكردلرينڭ بو قدر قيمتلى بشاراتِ قرآنيه‌يه و أقطابلرڭ إلتفاتنه مظهريتنڭ سرّى و حكمتى، مصيبتڭ عظمتى و دهشتيدر كه، هيچ بر أثرڭ مظهر اولماديغى بر قدسى تقدير و تحسين آلمش. ديمك أهمّيت اونڭ فوق العاده بيوكلگنده دگل، بلكه مصيبتڭ فوق العاده دهشتنه و تخريباتنه قارشى مجاهده‌سى آز اولديغى حالده غايت بيوك بر أهمّيت كسب ايتمش كه بو ايكى آيتده إشارت و بشارتِ قرآنيه‌ده إفاده ايدر كه، رسالهِٔ نور دائره‌سنه گيرنلر تهلكه‌ده اولان ايمانلرينى قورتارييورلر و ايمانله قبره گيرييورلر و جنّته گيده‌جكلر دييه مژده ويرييور. أوت بعض وقت اولور كه، بر نفر گورديگى خدمت ايچون بر مشيرڭ فوقنه چيقار، بيڭلر درجه قيمت آلير.

٭ ٭ ٭