﴿بِاسْمِهِ سُبْحَانَهُ﴾

عزيز، صدّيق قارداشلرم!

رسالهِٔ نورڭ خدمتنده‌كى أكثر شاكردلرى برر نوع كرامت و إكرامِ إلٰهى حسّ ايتدكلرى گبى· بو عاجز قارداشڭز چوق محتاج اولديغى ايچون، چوق نوعلرينى و چشيدلرينى حسّ ايدييور. و بو صيره‌لرده بو حواليده‌كى شاكردلر، يمينله إعتراف ايدييورلر كه: بز نورڭ خدمتنده چاليشدقجه هم معيشتجه، هم إستراحتِ قلبجه بر گنيشلك، بر فرح ظاهر بر صورتده حسّ ايدييورز. بن كندمجه او قدر حسّ ايدييورم كه، نفس و شيطانم، او بداهته قارشى حيرت ايده‌رك صوصديلر.

سعيد النورسى

٭ ٭ ٭

﴿بِاسْمِهِ سُبْحَانَهُ﴾

آخرت قارداشلريمه مهمّ بر إخطار

"ايكى مادّه"در:

برنجيسى:

رسالهِٔ نوره إنتساب ايدن كيمسه‌نڭ أڭ أهمّيتلى وظيفه‌سى، اونى يازمق و يازديرمقدر و إنتشارينه يارديم ايتمكدر. اونى يازان و يازديران و اوقويان، رسالهِٔ نور طلبه‌سى عنواننى آلير. و او عنوان آلتنده، هر يگرمى درت ساعتده بنم لسانمله بلكه يوز دفعه، بعضًا داها زياده خيرلى دعالرمده و معنوى قزانجلرمده حصّه‌دار اولمقله برابر· بنم گبى دعا ايدن قيمتدار بيڭلر قارداشلرم و رسالهٔ نور طلبه‌لرينڭ دعالرينه و قزانجلرينه دخى حصّه‌دار اولور.

هم درت وجهله درت نوع عبادتِ مقبوله حكمنده بولونان كتابتنده هم ايماننى قوّتلنديرمك، هم باشقه‌لرينڭ ايمانلرينى تهلكه‌دن قورتارمغه چاليشمق، هم حديثڭ حكميله، بر ساعت تفكّر بعضًا بر سنه قدر بر عبادت حكمنه گچن تفكّرِ ايمانىيى ألده ايتمك و ايتديرمك، هم حسنِ خطّى اولميان و وضعيتى چوق آغير بولونان استادينه يارديم ايتمكله حسناتنه إشتراك ايتمك گبى چوق فائده‌لرى ألده ايده‌بيلير. بن، قَسَمله تأمين ايدرم كه· بر كوچك رساله‌يى كندينه بيله‌رك يازان آدم، بڭا بيوك بر هديه ويرمش حكمنه گچر· بلكه هر بر صحيفه‌سى بر اوقّه شكر قدر بنى ممنون ايدر.