أى هيئتِ حاكمه! بو اوزون إفاداتمى ديڭله‌مكدن اوصانمه‌مق گركدر. چونكه يگرمى اوتوز كتاب، بنم توقيفنامه‌مڭ أوراقى ايچنه گيرمشلر. بو قدر إتهام أوراقمه قارشى، ألبته بو اوزون إفاده قيصه قالير. بن اون اوچ سنه‌در دنيا سياستنه قاريشمديغمدن، قانونلرى بيلمييورم. هم كنديمى مدافعه ايچون، آلداتمغه تنزّل ايتمديگمه تاريخچهِٔ حياتم شاهددر. بن، حقيقتِ حالى اولديغى گبى بيان ايتدم. سزڭ وجدانڭز وار و قانونلرڭ غدرسز وجهِ تطبيقلرينى بيليرسڭز، حقّمده حكمڭزى ويررسڭز. بونى ده بيليڭز كه: بعض إقتدارسز مأمورلرڭ إقتدارسزلقلرندن ويا أوهاملرندن ويا كچى و قورد بهانه‌سى نوعندن ويا كنديلرينه پايه ويرمك ويا حكومته يارانمق فكريله، يڭى سربستى قانونلرينڭ تطبيقلرينه زمين حاضرلامق أنتريقه‌لرندن، حقّمده دوربين ايله باقه‌رق حبّه‌يى قبّه گوسترديلر. سزلردن اميديمز شودر كه· إقتداريڭزدن، اونلرڭ أوهاملرينڭ قبّه‌سنڭ حبّه اولديغنى گوسترمكدر. يعنى اونلرڭ دوربينلرينى عكسنه چويروب باقارسڭز... هم بر رجام وار: مصادره ايديلن كتابلريمڭ، بيڭ ليرادن زياده بنجه قيمتلرى وار. بڭا إعاده ايديڭز. اونلرڭ مهمّ بر قسمى، اون ايكى سنه أوّل آنقره كتبخانه‌سنه إفتخار و تشكّر ايله قبول ايديلديگنى، كتبخانه ناظرى غزته ايله إعلان ايتمشدر. شيمديلك حياتمه حكملرى گچن هيئتڭزڭ رأييله، بو إفاده‌مڭ بر صورتنى مدّعىعمومىيه ويروب بنى بو ضرره صوقانلر عليهنده إقامهِٔ دعوا ايتمك و بر صورتنى داخليه وكالتنه و بر صورتنى ده مجلسِ مبعوثانه ويرمك ايسته‌يورم.

يوقاريده‌كى مدافعاتمڭ برنجى تتمّه‌سى

بنى إستنطاق ايدن ذاتڭ و هيئتِ حاكمه‌نڭ نظرِ دقّتلرينه! أوّلكى إفاده‌مه اوچ مادّه‌يى علاوه ايدييورم.

برنجى مادّه:

بزى حيرتده بيراقان و غايت شاشيرتان و بر غرضى إحساس ايدن و بِالإلتزام هيچدن بر سببِ إتهام ايجاد ايتمك نوعندن، مصرّانه بر جمعيت و تشكيلات وارمش گبى صورييورلر. "بو تشكيلاتى ياپمق ايچون نره‌دن پاره آلييورسڭز؟" دييورلر.