ايشته أهلِ ضلالتڭ ايمانسزلقدن گلن دهشتلى ألملرينه و قورقولرينه قارشى هيچ بر شى، هيچ بر فن، هيچ بر ترقّياتِ بشريه بر تسلّى ويره‌مز، قوّهِٔ معنويه‌يى تأمين ايده‌مز. جسارتى زير و زبر اولور. فقط موقّت غفلت پرده چكر، آلداتير.

أهلِ ايمان، ايمان جهتيله دگل قورقمق، قوّهِٔ معنويه‌سى قيريلمق، بلكه او تمثيلده‌كى معصوم چوجق گبى فوق العاده بر قوّهِٔ معنويه و بر متانتله و ايمانده‌كى حقيقتله اونلره باقييور. بر صانعِ حكيمڭ حكمت دائره‌سنده تدبير و إداره‌سنى مشاهده ايدر، أوهام و قورقولردن قورتولور. "صانعِ حكيمڭ أمرى و إذنى اولمادن بو سيّار كائناتلر حركت ايده‌مزلر، ايليشه‌مزلر." دييوب آڭلار. كمالِ أمنيتله حياتِ دنيويه‌سنده درجه‌سنه گوره سعادته مظهر اولور. كيمڭ قلبنده ايماندن و دينِ حقدن گلن بو حقيقت چكردگى بولونمازسه و نقطهِٔ إستنادى اولمازسه، بِالبداهه تمثيلده‌كى رستم و هركولڭ جسارتلرى و قهرمانلقلرى قيريلديغى گبى، اونڭ جسارتى و قوّهِٔ معنويه‌سى مضمحل اولور و وجدانى تفسّخ ايدر. و كائناتڭ حادثاتنه أسير اولور. هر شيئه قارشى قورقاق بر ديلنجى حكمنه دوشر. ايمانڭ بو سرِّ حقيقتنى و ضلالتڭ ده بو دهشتلى شقاوتِ دنيويه‌سنى رسالهٔ نور يوزر قطعى حجّتلرله إثبات ايتديگنه بناءً، بو پك اوزون حقيقتى قيصه كسييورز.

عجبا أڭ زياده قوّهِٔ معنويه‌يه و تسلّىيه و متانته إحتياجنى حسّ ايتمش بو عصرده‌كى بشر، بو زمانده او قوّهِٔ معنويه‌يى و تسلّىيى و سعادتى تأمين ايدن إسلاميت و ايمانده‌كى نقطهِٔ إستناد اولان حقائقِ ايمانيه‌يى بيراقوب، غربليلشمق عنوانى ايله إسلاميت ملّيتندن إستفاده يرينه، بتون بتون قوّهِٔ معنويه‌يى قيروب و تسلّىيى محو ايدن و متانتنى قيران ضلالت و سفاهته و يالانجى پوليتيقه و سياسته طايانماسى، نه قدر مصلحتِ بشريه‌دن و منفعتِ إنسانيه‌دن اوزاق بر حركت اولديغنى· پك ياقين بر زمانده إنتباهه گلمش، باشده إسلام اولارق، بشر حسّ ايده‌جك و دنيانڭ عمرى قالمشسه قرآنڭ حقائقنه ياپيشه‌جق.

٭ ٭ ٭