الحاصل: سرِّ اِنَّا اَعْطَيْنَاده چوق گنيش بر دائره‌يى، طار بر دائره‌ده تطبيق ايديلمش. نور مژده‌سى ايسه· طار و معنوى فقط يوكسك بر دائره‌يى، گنيش و مادّى بر دائره صورتنده تصوير ايديلمش. جنابِ حقّه يوز بيڭ شكر ايدييورم كه· بو ايكى قصوريمى،

﴿يُبَدِّلُ اللّٰهُ سَيِّئٰاتِهِمْ حَسَنَاتٍ﴾

سرّينه مظهر أيلدى.

سعيد النورسى

٭ ٭ ٭

خسروڭ بر فقره‌سيدر

چوق قيمتدار و چوق سَوْگيلى استادم أفنديم!

حضرتِ عيسى عليه السلامله دجّال حقّنده‌كى أحاديثِ متشابهه‌دن بر حديثڭ اوچ جهتله حقيقى تأويلنى بيان و ايضاح ايدن محمد فيضى و أمين قارداشلريمزڭ مبارك فقره‌لرينى صبرى قارداشم گوندرمش· بوگون آلدم، اوقودم. بو حديثِ شريفڭ مئالنه و حقيقى تأويللرينه او قدر محتاج ايميشم كه· قيزغين قوم صحرالرنده سنه‌لردن بَرى صوصامشلره آبِ حيات اوزاتير گبى روح و قلبم بر تازه حيات بولدى، دريندن درينه نَفَس آلدم، بتون لطائفلرم سرورله طولدى، ظاهرى جسدمدن معنوى قلبمه قدر سرايت ايتدى. سَوْگيلى استاديمز طلبه‌لرينى و قسطمونيلى قارداشلريمز ده بزلرى لطفلريله طويوردقلرندن، جنابِ حقّه حدسز شكر ايتدم. باشده سَوْگيلى استادم رسالة النورڭ كرامتنه و بو فقره‌نڭ فيضنه باقان اوچ إكرام ايله قارشيلاشدق.