چونكه اونلر، رسالة النوردن آلدقلرى ايمانِ تحقيقى درسلرينڭ نوريله و گوزيله، هر شيده رحمتِ إلٰهيه‌نڭ ايزينى، ئوزينى، يوزينى گوروب، هر شيده كمالِ حكمتنى، جمالِ عدالتنى مشاهده ايتدكلرندن كمالِ تسليميت و رضا ايله، ربوبيتِ إلٰهيه‌نڭ إجراآتندن اولان مصيبتلره قارشى تسليميتله، گوله‌رك قارشيلايورلر، رضا گوسترييورلر. و مرحمتِ إلٰهيه‌دن داها ايلرى شفقتلرينى سورمييورلر كه، ألم و عذاب چكسينلر. ايشته بو حقيقته بناءً، دگل يالڭز حياتِ اُخرويه‌نڭ، بلكه دنياده‌كى حياتڭ دخى سعادت و لذّتنى ايسته‌ينلر، (حدسز تجربه‌لرله) رسالة النورڭ ايمانى و قرآنى درسلرنده بولابيلير و بولويورلر.

سعيد النورسى

٭ ٭ ٭

أهمّيتلى بر خواجه‌نڭ استاد حقّنده زياده حسنِ ظنّنى تعديل ايتمك مناسبتيله أمين و فيضىنڭ او خواجه‌يه گوندردكلرى بر مكتوب

عزيز، صادق و محترم خواجه حشمت أفندى!

سزڭ، مجدّد حقّنده‌كى مكتوبڭزى حيرتله اوقودق، استاديمزه سويله‌دك. استاديمز دييور كه:

"أوت بو زمانده هم ايمان و دين، هم حياتِ إجتماعيه و شريعت، هم حقوقِ عامّه و سياستِ إسلاميه ايچون، غايت أهمّيتلى بر مجدّد ايستر. فقط أڭ أهمّيتليسى، حقائقِ ايمانيه‌يى محافظه نقطه‌سنده‌كى تجديد، أڭ مقدّس و أڭ بيوگيدر. شريعت و حياتِ إجتماعيه و سياسيه دائره‌لرى اوڭا نسبةً ايكنجى، اوچنجى، دردنجى درجه‌ده قالييور.

روايتِ حديثيه‌ده، تجديدِ دين حقّنده‌كى زياده أهمّيت ايسه، ايمانى حقائقده‌كى تجديد إعتباريله‌در. فقط أفكارِ عامّه‌ده و حياتپرست إنسانلرڭ نظرنده ظاهرًا گنيش و حاكميت نقطه‌سنده جاذبه‌دار اولان حياتِ إجتماعيهِٔ إسلاميه و سياستِ دينيه جهتلرى داها زياده أهمّيتلى گورونديگى ايچون، او عدسه ايله او نقطهِٔ نظردن باقييورلر، معنا ويرييورلر.