خليل إبراهيمڭ رسالهِٔ نوره خطابًا يازديغى بر فقره‌در.

﴿اَلْحَمْدُ ِللّٰهِ عَلَى الرِّسَالَةِ النُّورِيَّةِ﴾

شموسِ قرآنڭ أنوارلرندن إنعكاس ايدن أجرامِ علويه، سيّارات و ثوابتِ كوكبيه و أزهارِ مزيّنهِٔ روضهِٔ صفائيه و حقائقآشنا ايله مملو درِّ مكنونه،

﴿اَلْمُؤَيَّدُ بِالدَّلَائِلِ الْعَقْلِيَّةِ وَ التَّسْلِيمِيَّةِ﴾

اولان رسالهِٔ نوريه، أسرارِ كتاب اللّٰه، عالمى ضيالانديردى و إن شاء اللّٰه دائمى ضيالانديره‌جقدر. و اويله بر شاه أثردر كه، سلفِ صالحينڭ أثرلرينڭ صوڭنده گلمكله هپسندن ايلريده‌در. اويله مبذول بر فيض وار كه، أڭ ظلمتلى قلبلرى دخى نورِ ايمان ايله نورلانديرر. و اويله بر معرفتِ إلٰهيه‌يى سرد و بيان أيلر كه، كورلره بيله گوستردى.

او بنم گوزيمڭ نورى، قلبمڭ سرورى، گوڭلمڭ بلبلى، روحمڭ غداسى، لطائفمڭ إنجلاسى، جانمڭ جانى... بن اونڭ هر بر حقيقتنه بيڭ جان ويرسه‌م، إن شاء اللّٰه بر جانه مقابل باقيده بيڭ جان آلاجغم. او بنم قبرده أنيسم، برزخده رفيقم و ميزانده أعمالم، صراطده براقم، جنّتده يولداشم...

بن اونڭ حقّنده ناصل تعريف ايده‌بيليرم؟ يگرمى سكزنجى مكتوبده سرد ايديلن

﴿وَ مَا مَدَحْتُ مُحَمَّدًا بِمَقَالَتِى ٭ وَ لٰكِنْ مَدَحْتُ مَقَالَتِى بِمُحَمَّدٍ﴾

فحواسنجه بن ده ديرم:

﴿وَ مَا مَدَحْتُ رِسَالَةَ النُّورِ بِمَقَالَتِى ٭ وَ لٰكِنْ مَدَحْتُ مَقَالَتِى بِرِسَالَةِ النُّورِ﴾

هم نه حدّمه دوشمش كه، او منشورِ قرآندن بحث ايده‌يم! اولسه، اولابيلسه بو فقير، اوندن إستشفاء و إستشفاع و إستفاضه ايده‌بيلير. شويله كه:

﴿گَرْ نَه خَواهِى دَادْ نَه دَادِى خَواهْ﴾

قاعده‌سنجه رضاىِ بارىنڭ كنديسندن خوشنود و راضى اولماسنى ايسترز. و اونڭ نوريله دنياده بتون عالمِ إسلامڭ نورلانماسنى ايسترز. و طلبه‌لرينڭ دنياده برر آرسلان و آخرتده برر سلطان اولماسنى و لواء الحمد سنجاغنڭ آلتنده، اوڭده استاديمزله، بتون طلبه‌لريله وارمق ايسترز.