نماز تسبيحاتنڭ فضيلتنه عائد إسپارطه‌يه گوندريلن بر مكتوبدر

بوگونلرده اينجه بر مسئله قلبمه گلدى. وقتنده قلمه آلامدم. وقت گچدكدن صوڭره او أهمّيتلى حقيقته بر إشارت ايدرز:

قارداشلريمزدن بريسنڭ نماز تسبيحاتنده تكاسلنه بناءً ديدم: نمازدن صوڭره‌كى تسبيحاتلر، طريقتِ محمّديه‌در (عصم) و ولايتِ أحمديه‌نڭ (عصم) بر أوراديدر. او نقطهِٔ نظرده أهمّيتى بيوكدر. صوڭره، بو كلمه‌نڭ حقيقتى بويله إنكشاف ايتدى: ناصلكه رسالته إنقلاب ايدن ولايتِ أحمديه (عصم) بتون ولايتلرڭ فوقنده‌در· اويله ده، او ولايتڭ طريقتى و او ولايتِ كبرانڭ أورادِ مخصوصه‌سى اولان فرض نمازلرڭ عقبنده‌كى تسبيحات، او درجه سائر طريقتلرڭ و أورادلرڭ فوقنده‌در. و بو سرّ دخى شويله إنكشاف ايتدى:

ناصل ذكر دائره‌سنده بر مجلسده وياخود ختمهِٔ نقشيه‌ده بر مسجدده بربريله علاقه‌دار هيئتِ مجموعه‌ده نورانى بر وضعيت حسّ ايديلييور. اويله ده قلبى هشيار بر ذات، نمازدن صوڭره

﴿سُبْحَانَ اللّٰهِ سُبْحَانَ اللّٰهِ﴾

دييوب تسبيحى چكركن، او دائرهِٔ ذكرڭ رئيسى اولان ذاتِ أحمديه‌نڭ (عصم) مواجهه‌سنده، تسبيح ألنده يوز ميليون آدم تسبيح چكدكلرينى معنًا حسّ ايدر· او عظمت و علويتله

﴿سُبْحَانَ اللّٰهِ سُبْحَانَ اللّٰهِ﴾

دير. صوڭره او سرذاكرڭ أمرِ معنويسيله اوڭا إتّباعًا

﴿اَلْحَمْدُ ِللّٰهِ اَلْحَمْدُ ِللّٰهِ﴾

ديديگى وقت، او حلقهِٔ ذكرڭ و او گنيش دائره‌سى بولونان ختمهِٔ أحمديه‌نڭ (عصم) دائره‌سنده يوز ميليون مريدلرڭ

﴿اَلْحَمْدُ ِللّٰهِ اَلْحَمْدُ ِللّٰهِ﴾

لرندن تظاهر ايدن عظمتلى بر حمدى دوشونوب ايچنده

﴿اَلْحَمْدُ ِللّٰهِ اَلْحَمْدُ ِللّٰهِ﴾

ايله إشتراك ايدر و هكذا...

﴿اَللّٰهُ اَكْبَرُ اَللّٰهُ اَكْبَرُ﴾

و دعادن صوڭره

﴿لَا اِلٰهَ اِلَّا اللّٰهُ لَا اِلٰهَ اِلَّا اللّٰهُ﴾

اوتوز اوچ دفعه او طريقتِ أحمديه‌نڭ (عصم) حلقهِٔ ذكرنده و ختمهِٔ كبراسنده او سابق معنا ايله او إخوانِ طريقتى نظره آلوب، او حلقه‌نڭ سرذاكرى اولان ذاتِ أحمديه‌يه (عصم) متوجّه اولوب

﴿اَلْفُ اَلْفِ صَلَاةٍ وَ اَلْفُ اَلْفِ سَلَامٍ عَلَيْكَ يَا رَسُولَ اللّٰهِ﴾

دير، دييه آڭلادم و حسّ ايتدم و خيالاً گوردم. ديمك تسبيحاتِ صلاتيه‌نڭ چوق أهمّيتى وار.

سعيد النورسى

٭ ٭ ٭