أوت قرآنڭ عليهنده بيڭ سنه‌دن بَرى منتقمانه حاضرلانان دينسزلرڭ إعتراضلرينى و كافر فيلسوفلرڭ تراكم ايدوب شيمدى يول بولارق إنتشار ايدن شبهه‌لرينى و قرآنڭ دهشتلى ضربه‌لرندن إنتقام بسله‌ين معنّد يهوديلرڭ و مغرور بر قسم خرستيانلرڭ هجوملرينى دفع ايدوب مقابله ايدن و هر عصرده قرآنڭ پك چوق قهرمانلرى و معنوى قلعه‌لرى واردى. شيمدى إحتياج بر ايكيدن، يوزه چيقمش. و مدافعلر يوزدن، ايكى اوچه اينمش. هم حقائقِ ايمانيه‌يى، علمِ كلامدن و مدرسه‌دن اوگرنمك چوق زمانه محتاج بولونديغندن بو زمانده او قپو دخى قپاندى. هم چابوق، هم هركس آڭلايه‌جق بر طرزده أڭ درين حقيقتلرى تعليم ايدن رسالهِٔ نور، ألبته إمامِ على رضى اللّٰه عنهڭ بو إلتفاتنه لايقدر.

هم إمامِ على (رض) اوننجى مرتبهِٔ تعدادنده اوننجى سوره اولارق و قيامت و ليلهِٔ برائته باقان

﴿وَبِسُورَةِ الدُّخَانِ فِيهَا سِرًّا قَدْ اُحْكِمَتْ﴾

دييوب معناىِ إشاريسيله اوننجى سوز نامنده و مرتبه‌سنده اولان حشر رساله‌سنه إشارتله برابر او رساله‌نڭ فوق العاده أهمّيتنى و غايت محكم اولديغنى و او زمانڭ دومانلى قراڭلقلرينى إزاله ايدن بر ليلهِٔ برائتڭ بر قنديلى حكمنده بولونماسنه و حشر و قيامتڭ بر علامتى اولان دخان، هم ليلهِٔ برائتڭ سنوى اولارق حكمتلى تفريق و تقسيمِ امور نقطه‌لريله و باشقه قرينه‌لر ايله ايماءً و رمزًا خبر ويرييور.