أى مؤمنِ قلب هشيار! شيمدى گوزلريمز بر پارچه ديڭله‌نسينلر، اونلرڭ بدلنه حسّاس قولاغمزى ايمانڭ مبارك ألنه تسليم ايدرز، دنيايه گوندريرز. ديڭله‌سين لذيذ بر ساز.

أوّلكى يولمزده بر ماتمِ عمومى، هم واويلاىِ موتى ظن اولونان او سسلر، شيمدى يولمزده برر نواز و نماز، برر آواز و نياز، برر تسبيحه آغاز.

ديڭله، هواده‌كى دمدمه، قوشلرده‌كى جيوجيوه، ياغمورده‌كى زمزمه، دڭزده‌كى غمغمه، رعدلرده‌كى رقرقه، طاشلرده‌كى تقتقه برر معنيدار نواز...

ترنّماتِ هوا، نعراتِ رعديه، نغماتِ أمواج، برر ذكرِ عظمت. ياغمورڭ هزجاتى، قوشلرڭ سجعاتى برر تسبيحِ رحمت، حقيقته بر مجاز.

أشياده اولان أصوات، برر صوتِ وجوددر: بن ده وارم ديرلر. او كائناتِ ساكت، بردن سوزه باشلايور: "بزى جامد ظن ايتمه، أى إنسانِ بوش بوغاز!"

طيورلرى سويلتديرر يا بر لذّتِ نعمت، يا بر نزولِ رحمت. آيرى آيرى سسلرله، كوچك آغازلريله رحمتى آلقيشلارلر، نعمت اوستنده اينر، شكر ايله ايدر پرواز.

رمزًا اونلر ديرلر: "أى كائنات قارداشلر! نه گوزلدر حالمز: شفقتله پرورده‌يز، حالمزدن ممنونز. سيورى ديمديكلريله فضايه صاچييورلر برر آوازِ پرناز.

گويا بتون كائنات علوى بر موسيقيدر، ايمان نورى ايشيتير أذكار و تسبيحلرى. زيرا حكمت ردّ ايدر تصادف وجودينى، نظام ايسه طرد ايدر إتّفاقِ أوهامساز.

أى يولداش! شيمدى شو عالمِ مثاليدن چيقارز، خيالى وهمدن اينه‌رز، عقل ميداننده طورورز، ميزانه چكرز، ايدرز يوللرى بَر أنداز.

أوّلكى أليم يولمز مغضوب و ضالّين يولى، او يول ويرر وجدانه، تا أڭ درين يرينه هم بر حسِّ أليمى، هم بر شديد ألمى. شعور اونى گوسترر. شعوره ضد اولمشز.

هم قورتولمق ايچون ده مضطر و هم محتاجز· يا او تسكين ايديلسين، يا إحساس ده اولماسين· يوقسه طايانه‌مايز، فرياد و فيزار ديڭلنمز.