يدنجى سرِّ بلاغت:

كاه اولويور كه آيت· ظاهرى سببى، ايجادڭ قابليتندن عزل ايتمك و اوزاق گوسترمك ايچون مسبَّبڭ غايه‌لرينى، ثمره‌لرينى گوسترييور. تا آڭلاشيلسين كه· سبب، يالڭز ظاهرى بر پرده‌در. چونكه غايت حكيمانه غايه‌لرى و مهمّ ثمره‌لرى إراده ايتمك، غايت عليم، حكيم برينڭ ايشى اولمق لازمدر. سببى ايسه شعورسز، جامددر. هم ثمره و غايتنى ذكر ايتمكله آيت گوسترييور كه· سببلر چندان نظرِ ظاهريده و وجودده مسبّبات ايله متّصل و بتيشيك گورونور. فقط حقيقتده مابيْنلرنده اوزاق بر مسافه وار. سببدن مسبَّبڭ ايجادينه قدر او درجه اوزاقلق وار كه· أڭ بيوك بر سببڭ ألى، أڭ أدنا بر مسبَّبڭ ايجادينه يتيشه‌مز. ايشته سبب و مسبَّب اورته‌سنده‌كى اوزون مسافه‌ده، أسماءِ إلٰهيه برر ييلديز گبى طلوع ايدر. مطلعلرى، او مسافهِٔ معنويه‌در. ناصلكه ظاهر نظرده طاغلرڭ دائرهِٔ اُفقنده سمانڭ أتكلرى متّصل و مقارن گورونور. حالبوكه دائرهِٔ اُفقِ جباليدن سمانڭ أتگنه قدر، عموم ييلديزلرڭ مطلعلرى و باشقه شيلرڭ مسكنلرى اولان بر مسافهِٔ عظيمه بولونديغى گبى· أسباب ايله مسبّبات مابيْننده اويله بر مسافهِٔ معنويه وار كه، ايمانڭ دوربينيله، قرآنڭ نوريله گورونور. مثلا:

﴿فَلْيَنْظُرِ اْلاِنْسَانُ اِلٰى طَعَامِهِ ٭ اَنَّا صَبَبْنَا الْمَاءَ صَبًّا ٭ ثُمَّ شَقَقْنَا الْاَرْضَ شَقًّا ٭ فَاَنْبَتْنَا فِيهَا حَبًّا ٭ وَ عِنَبًا وَ قَضْبًا ٭ وَ زَيْتُونًا وَ نَخْلاً ٭ وَ حَدَائِقَ غُلْبًا ٭ وَ فَاكِهَةً وَ اَبًّا ٭ مَتَاعًا لَكُمْ وَ لِاَنْعَامِكُمْ﴾

ايشته شو آيتِ كريمه، معجزاتِ قدرتِ إلٰهيه‌يى بر ترتيبِ حكمتله ذكر ايده‌رك أسبابى مسبّباته ربط ايدوب أڭ آخرده

﴿مَتَاعًا لَكُمْ﴾

لفظيله بر غايه‌يى گوسترر كه· او غايه، بتون او متسلسل أسباب و مسبّبات ايچنده او غايه‌يى گورن و تعقيب ايدن گيزلى بر متصرّف بولونديغنى و او أسباب، اونڭ پرده‌سى اولديغنى إثبات ايدر. أوت

﴿مَتَاعًا لَكُمْ وَ لِاَنْعَامِكُمْ﴾

تعبيريله بتون أسبابى، ايجاد قابليتندن عزل ايدر. معنًا دير: "سزه و حيواناتڭزه رزقى يتيشديرمك ايچون صو سمادن گلييور. او صوده، سزه و حيواناتڭزه آجييوب شفقت ايدوب رزق يتيشديرمك قابليتى اولماديغندن· صو گلمييور، گوندريلييور ديمكدر. هم طوپراق، نباتاتيله آچيلوب، رزقڭز اورادن گلييور. حسسز، شعورسز طوپراق، سزڭ رزقڭزى دوشونوب شفقت ايتمك قابليتندن پك اوزاق اولديغندن، طوپراق كندى كندينه آچيلمه‌يور، بريسى او قپويى آچييور، نعمتلرى أللريڭزه ويرييور. هم اوتلر، آغاجلر سزڭ رزقڭزى دوشونوب مرحمةً سزه ميوه‌لرى، حبوباتى يتيشديرمكدن پك چوق اوزاق اولديغندن، آيت گوسترييور كه، اونلر بر حكيمِ رحيمڭ پرده آرقه‌سندن اوزاتديغى ايپلر و شريدلردر كه، نعمتلرينى اونلره طاقمش، ذىحياتلره اوزاتيور. ايشته شو بياناتدن رحيم، رزّاق، منعم، كريم گبى چوق أسمانڭ مطلعلرى گورونويور. هم مثلا: