و كذا اويله بر اللّٰه كه، وجوب و وجودينه، جلال و جمالنه، واحدِ أحد اولديغنه شهادت ايدنلردن بريسى ده "فرقانِ حكيم"در.

و اويله بر فرقانِ حكيمدر كه، بتون أنبيا كتابلرينڭ تصديقلرينه مظهردر. و اويله بر فرقانِ حكيمدر كه، بتون عقللر و قلبلر، حكملرينى قبول و تصديقه إجماع ايتدكلرى و جهاتِ ستّه‌سندن نورأفشان بر كتابدر.

و اويله بر فرقانِ حكيمدر كه، مظهرِ وحى اولان رسوللرجه، محضِ وحيدر. أهلِ كشف و إلهامجه عينِ هدايتدر. معدنِ ايمان و مجمعِ حقائقدر. حكملرى دلائلِ عقليه ايله مؤيّد و فطرتِ سليمه‌نڭ شهادتيله مصدّقدر. لسان الغيب اولوب، عالمِ شهادتده نوعِ بشرى

﴿فَاعْلَمْ اَنَّهُ لَا اِلٰهَ اِلَّا اللّٰه﴾

ايله توحيده أمر و دعوت ايدييور.

اويله بر اللّٰه كه، وجوبِ وجود و وحدتنه، شو كتابِ كبير دينيلن عالم، بتون يازيلرى و فصللريله، صحيفه‌لريله، سطرلريله، جمله‌لريله، حرفلريله شهادت ايتديگى گبى· شو إنسانِ كبير دينيلن كائنات ده، بتون أعضاسيله، جوارحيله، حجيراتيله، ذرّاتيله، أوصافيله، أحواليله دلالت ايدر. يعنى بو كائنات، إحتوا ايتديگى بتون أنواعيله

﴿لَا اِلٰهَ اِلَّا اللّٰه﴾

و او عالملرڭ أركانيله

﴿لَا خَالِقَ اِلَّا هُوَ﴾

و او أركانڭ أعضاسيله

﴿لَا صَانِعَ اِلَّا هُوَ﴾

و او أعضانڭ أجزاسيله

﴿لَا مُدَبِّرَ اِلَّا هُوَ﴾

و او أجزانڭ جزئياتيله

﴿لَا مُرَبِّىَ اِلَّا هُوَ﴾

و او جزئياتڭ حجيراتيله

﴿لَا مُتَصَرِّفَ اِلَّا هُوَ﴾

و او حجيراتڭ ذرّاتيله

﴿لَا خَالِقَ اِلَّا هُوَ﴾

و او ذرّاتڭ تارلاسى اولان أثيريله

﴿لَا اِلٰهَ اِلَّا هُوَ﴾

سويله‌يه‌رك· بتون أنواعيله، أركانيله، أعضاسيله، أجزاسيله، حجيراتيله، ذرّاتيله، أثيريله (أللى بش لسان ايله) وجوبِ وجود و وحدتنه شهادت و دلالت ايدر. شو لسانلرڭ تفصيلى گله‌جكدر. شيمدى إجمال ايله ذكر ايده‌جگم. شويله كه:

كائنات تركيبلرنده‌كى إنتظام، جريانِ أحوالده‌كى نظام، صورتلرده‌كى غرابت، نقشلرنده‌كى زينت، يوكسك حكمتلر، أشياده‌كى مخالفت و مماثلت، جامداتده‌كى معاونت، بربرندن اوزاق اولان شيلرده‌كى تساند، حكمتِ عامّه، عنايتِ تامّه، رحمتِ واسعه، رزقِ عام، حياتلر، تصرّف، تحويل، تغيير، تنظيم، إمكان، حدوث، إحتياج، ضعف، موت، جهل، عبادت، تسبيحات، دعوات و هكذا پك چوق صفتلر لسانلريله خالقِ قديمِ قديرڭ وجوب و وجودينه و أوصافِ كماليه‌سنه شهادت ايتدكلرى گبى· أسماءِ حسنىيى تلاوت ايده‌رك، جنابِ حقّه تسبيح و قرآنِ حكيمى تفسير و رسولِ أكرمڭ (عصم) إخباراتنى تصديق ايدييورلر.