برنجى باب

﴿لَا اِلٰهَ اِلَّا اللّٰه﴾

بياننده‌در.

﴿اَلْحَمْدُ للّٰه رَبِّ الْعَالَمِينَ وَ الصَّلَاةُ وَ السَّلَامُ عَلٰى سَيِّدِ الْمُرْسَلِينَ مُحَمَّدٍ وَ عَلٰى اٰلِهِ وَ صَحْبِهِ اَجْمَعِينَ﴾

اللّٰهدن باشقه حق بر إلٰهڭ بولونماديغنى قلبًا تصديق و لسانًا إقرار ايتديگمه، بتون گورن و گورونن أشيايى شاهد گوسترييورم.

اويله بر اللّٰه كه، وجوبِ وجودينه و واحد أحد، فرد صمد اولديغنه حضرتِ محمّد (عصم) بر شاهدِ صادق و بر برهانِ ناطقدر.

اويله محمّد (عصم) كه، إجماع و تصديقلرينه مظهر اولمقله، أنبيا و مرسلينه سيادت عنواننى· و إتّفاق و تحقيقلرينى آلمقله، إمامُ الأوليا و العلماء لقبنى آلمشدر. و اويله محمّد (عصم) كه، آياتِ باهره، معجزاتِ قاطعه و سجاياىِ ساميه و أخلاقِ عاليه صاحبى اولمقله مَهْبِطِ وحىِ إلٰهى اولمشدر. و اويله بر محمّد (عصم) كه، عالمِ غيب و ملكوتى سير و زيارت ايتمكله، أرواحى مشاهده و ملائكه ايله مصاحبه، جنّ و إنسانلره إرشاد وظيفه‌سنى آلمشدر. و اويله بر محمّد (عصم)در كه، شخصيتِ معنويه‌سيله كائناتڭ كمالنه بر فهرسته اولمقله، بتون سعادتلرڭ و مدنيتلرڭ دستورلرينى حاوى بر شريعته صاحبدر. و اويله بر محمّد (عصم)در كه، عالمِ شهادتده ايكن غيبياتدن خبر ويرر بر بشير و نذير اولوب بتون قوّتيله، كمالِ جدّيتله و وثوق ايله و إطمئنان ايله يوكسك بر ايمان ايله نوعِ بشره قارشى "توحيد دينى"نى

﴿لَا اِلٰهَ اِلَّا اللّٰه﴾

ايله إعلان و إعلام ايدييور.