آلتنده‌كى شيلره بِالذّات تصرّف ايدن إمكان دائره‌سنده كيمسه وار ميدر؟ كلاّ! چونكه او قدرت قيصه و قاصر اولمايوب محيط بر قدرت اولديغندن، آچيق بر ير، بر دليك قالمييور كه، غير مداخله ايتسين. مع هذا جبروتيت و إستقلاليتڭ عزّتى و كندينى سَوْديرمك و طانيتديرمق محبّتى، غيره مساعده ايتمييور كه، آراده عباد اللّٰهڭ أنظارينى كندينه جلب ايدن إسمى بر واسطه بولونسون. مع هذا كلّ ايله جزءده، نوع ايله فردده ياپيلان تصرّفات، بربرينڭ ايچنده متداخل و يكديگرينه متساند اولديغندن، او تصرّفلرى آيرى آيرى فاعللره ويرمك ممكن دگلدر. مثلا: عالمڭ نظام، إنتظام و تصرّفنده أرضڭ تدبيرى داخلدر. أرضڭ تدبيرنده إنسانڭ ده تدبيرى داخلدر. و عين زمانده بو تصرّفات ياپيليركن، باشقه نوعلرڭ ده شئوناتنه باقيلير. و حجيراتِ بدنيه ايله ذرّات دخى ياراديلييور. و هكذا بتون بو تصرّفات بتون صفحاته عين قدرتله ياپيلير. ناصلكه شمسڭ نورندن، قطره و قبارجقلره وارنجه‌يه قدر هيچ بر شى خارج قالمييور. بتون أشيا او نور ايله تنوّر ايدييور.

كذالك بتون تصرّفات، قدرتِ أزليه‌يه عائددر. باشقه بر شيئڭ مداخله‌سى يوقدر. كره‌دن ذرّه‌يه وارنجه‌يه قدر او قدرتڭ تصرّفندن خارج دگلدر.

خلاصه: آرينڭ دماغنى، ميقروبڭ گوزينى تنظيم ايدن ذات، سنڭ أفعال و أعمالڭى مهمل، باشىبوش، حسابسز، كتابسز بيراقميه‌رق "إمامِ مبين"ده يازار. اوڭا گوره محاسبه‌ڭ اولاجقدر.

إعلم أيّها العزيز!

هر بر مصنوعده، هر بر ذرّه‌ده گورونن تصرّفِ مطلق، قدرتِ محيطه و حكمتِ بصيره‌نڭ دلالت و شهادتلريله ثابتدر كه، بتون أشيانڭ صانعى واحددر، شريكى يوقدر. نه قدرتنده إنقسام وار، نه إقتدار و إختيارنده تجزّى واردر. بناءً عليه صانع آنجق واجب الوجود اولاجقدر كه، قدرڭ ميزانيله يوروين قدرتنه بر نهايت يوقدر.

إعلم أيّها العزيز!

سينك، ئورومجك، پيره گبى كوچك حيوانلر، فيل، جاموس، دوه گبى بيوك حيوانلردن داها ذكى، خلقتجه داها گوزل، صنعتجه داها تام اولدقلرى حالده، بونلرڭ عمرى قيصه اونلرڭكى اوزون، بونلرڭ ظاهرًا منفعتلرى يوق، اونلرڭكى وار. ايشته بو حال، خلقتِ أشياده صانعڭ كلفتى اولماديغنه و هر شيئڭ وجوده گلمه‌سى آنجق "كُنْ" أمريله اولديغنه باهر بر برهاندر.

﴿يَفْعَلُ اللّٰه مَا يَشَاءُ ٭ لَا اِلٰهَ اِلَّا هُوَ﴾