ايكنجيسى حقيقى توحيددر كه: "اللّٰه بردر، ملك اونڭدر، وجود اونڭدر، هر شى اونڭدر." دير· لايتزلزل بر إعتقاده صاحبدرلر. بو قسم توحيد صاحبلرى، هر شيئڭ اوستنده جنابِ حقّڭ سكّه‌سنى گورور و هر شيئڭ جبهه‌سنده بولونان مُهرينى، طامغه‌سنى اوقور. و بو سايه‌ده حضورى بر توحيد مَلكه‌سى مالكى اولورلر كه، ضلالت و أوهامڭ تعرّضندن قورتولورلر.

قرآنِ حكيمدن إستفاده ايتديگمز ايكنجى قسم توحيدڭ بر قاچ مرتبه‌لرينى بر قاچ لمعه ضمننده ايضاح ايده‌جگز:

برنجى لمعه:

باقڭز! هر بر مصنوعڭ يوزنده اويله بر سكّه واردر كه، آنجق هر شيئى خلق ايدن خالقه مخصوصدر. و هر بر مخلوقڭ جبهه‌سنده اويله بر خاتم وورولمشدر كه، هر شيئى ياپان صانعدن ماعدا كيمسه‌ده او خاتم بولونماز. و قدرتڭ نشر ايتديگى مكتوبلرندن هر بر مكتوبڭ آخرنده، تقليدى قابل اولاميان اويله بر طرّه واردر كه، آنجق سلطانِ أزل و أبده خاصدر. او گبى سكّه‌لردن يالڭز حيات اوزرنده پارلايان سكّهِٔ إعجازه باقڭز كه· حيات ايله بر شيدن پك چوق شيلر حصوله گلير، ايجاد ايديلير. و پك چوق شيلر دخى بر شيءِ واحده أمرِ ربّانيله إنقلاب ايدرلر. مثلا: صو، بر شيءِ واحد ايكن پك چوق عضولره، جهازلره اللّٰهڭ إذنى ايله منشأ اولور، ايجاد ايديليرلر. و معده‌يه گيرن پك چوق مختلف يمكلر و ميوه‌لردن خالق تعالى تك بر جسمى ايجاد ايدر، تك بر جسم حصوله گتيرر.

ايشته قلب، عقل، شعور صاحبى اولان بر آدم، بو جهتى دوشونورسه آڭلار كه، بر شيدن چوق شيلرى ايجاد ايدوب چيقارتمق و چوق شيلرى بر شيئه تحويل ايتمك، آنجق هر شيئى خلق ايدن و هر شيئى ياپان صانعه مخصوص بر سكّه‌در.