ثامنًا:

ضعفِ دينه سبب اولان آوروپا مدنيتِ سفيهانه‌سى ييرتيلمغه يوز طوتديغى بر زمانده و مدنيتِ قرآنڭ ظهوره ياقين گلديگى بر آنده، لاقيدانه و إهمالكارانه مثبت بر ايش گورولمز. منفيجه، تخريبكارانه ايش ايسه، بو قدر رخنه‌لره معروض قالان إسلام ذاتًا محتاج دگلدر.

تاسعًا:

سزڭ بو "إستقلال حربى"نده‌كى مظفّريتڭزى و عالى خدمتڭزى تقدير ايدن و سزى جان و دلدن سَون، جمهورِ مؤمنيندر. و بِالخاصّه طبقهِٔ عوامدر كه صاغلام مسلمانلردر. سزى جدّى سَور و سزى طوتار و سزه منّتداردر و فداكارلغڭزى تقدير ايدرلر. و إنتباهه گلمش أڭ جسيم و مدهش بر قوّتى سزه تقديم ايدرلر. سز دخى، أوامرِ قرآنيه‌يى إمتثال ايله اونلره إتّصال و إستناد ايتمه‌ڭز مصلحتِ إسلام نامنه ضروريدر. يوقسه، إسلاميتدن تجرّد ايدن بدبخت، ملّيتسز آوروپا مفتونى فرنك مقلّدلرى، عوامِ مسلمينه ترجيح ايتمك، مصلحتِ إسلامه منافى اولديغندن، عالمِ إسلام نظرينى باشقه طرفه چويره‌جك و باشقه‌سندن إستمداد ايده‌جك.

عاشرًا:

بر يولده طوقوز إحتمال هلاكت، تك بر إحتمال نجات وارسه· حياتندن واز گچمش، مجنون بر جسور لازم كه او يوله سلوك ايتسين. شيمدى، يگرمى درت ساعتدن بر ساعتى إشغال ايدن فرض نماز گبى ضرورياتِ دينيه‌ده، يوزده طقسان طوقوز إحتمال نجات وار. يالڭز، غفلت و تنبللك حيثيتيله، بر إحتمال ضررِ دنيوى اولابيلير. حالبوكه فرائضڭ تركنده، طقسان طوقوز إحتمال ضرر وار. يالڭز غفلت و ضلالته إستناد، تك بر إحتمال نجات اولابيلير. عجبا دينه و دنيايه ضرر اولان إهمال و فرائضڭ تركنه نه بهانه بولونه‌بيلير؟ حميت ناصل مساعده ايدر؟