رابعًا:

بو ملّتِ إسلامڭ جماعتلرى (چندان بر جماعت نمازسز قالسه، فاسق ده اولسه ينه) باشلرنده‌كينى متديّن گورمك ايستر. حتّى عموم كردستانده، عموم مأمورلره دائر أڭ أوّل صوردقلرى سؤال بو ايمش: "عجبا نماز قيلييور مى؟" ديرلر. نماز قيلارسه مطلق أمنيت ايدرلر· قيلمازسه، نه قدر مقتدر اولسه نظرلرنده متّهمدر. بر زمان، بيت الشباب عشائرنده عصيان واردى. بن گيتدم، صوردم: "سبب نه‌در؟" ديديلر كه: "قائمِمقاممز نماز قيلمييوردى، راقى ايچييوردى. اويله دينسزلره ناصل إطاعت ايده‌جگز؟" بو سوزى سويله‌ينلر ده نمازسز، هم ده أشقيا ايديلر.

خامسًا:

أنبيانڭ أكثرى شرقده و حكمانڭ أغلبى غربده گلمه‌سى قدرِ أزلينڭ بر رمزيدر كه، شرقى آياغه قالديره‌جق دين و قلبدر، عقل و فلسفه دگل. شرقى إنتباهه گتيرديگز، فطرتنه موافق بر جريان ويريڭز. يوقسه، سعيڭز يا هباءً گيدر ويا موقّت، سطحى قالير.

سادسًا:

خصمڭز و إسلاميت دشمنى اولان فرنكلر دينده‌كى لاقيدلغڭزدن پك فضله إستفاده ايتديلر و ايدييورلر. حتّى دييه‌بيليرم كه، خصمڭز قدر إسلامه ضرر ويرن، دينده إهمالڭزدن إستفاده ايدن إنسانلردر. مصلحتِ إسلاميه و سلامتِ ملّت نامنه، بو إهمالى اعماله تبديل ايتمه‌ڭز گركدر. گورولمييور مى كه، إتّحادجيلر او قدر خارقه عزم و ثبات و فداكارلقلريله، حتّى إسلامڭ شو إنتباهنه ده بر سبب اولدقلرى حالده، بر درجه دينده لااباليلك طورينى گوستردكلرى ايچون، داخلده‌كى ملّتدن نفرت و تزييف گورديلر. خارجده‌كى إسلاملر دينده‌كى إهماللرينى گورمدكلرى ايچون حرمتى ويرديلر.

سابعًا:

عالمِ كفر، بتون وسائطيله، مدنيتيله، فلسفه‌سيله، فنونيله، مِسْيونرلريله عالمِ إسلامه هجوم و مادّةً اوزون زماندن بَرى غلبه ايتديگى حالده، (عالمِ إسلامه) دينًا غلبه ايده‌مدى. و داخلى بتون فِرَقِ ضالّهِٔ إسلاميه ده، برر كميهِٔ قليلهِٔ مضرّه صورتنده محكوم قالديغى· و إسلاميت متانتنى و صلابتنى سنّت و جماعتله محافظه أيلديگى بر زمانده، لااباليانه، آوروپا مدنيتِ خبيثه قسمندن سوزولن بر جريانِ بدعتكارانه، سينه‌سنده ير طوتاماز. ديمك عالمِ إسلام ايچنده مهمّ و إنقلابوارى بر ايش گورمك، إسلاميتڭ دساتيرينه إنقياد ايله اولابيلير، باشقه اولاماز. هم اولمامش، اولمش ايسه ده چابوق ئولوب، سونمش...