عدالتِ محضه ايله عدالتِ إضافيه‌نڭ ايضاحى شودر كه:

﴿مَنْ قَتَلَ نَفْسًا بِغَيْرِ نَفْسٍ اَوْ فَسَادٍ فِى الْاَرْضِ فَكَاَنَّمَا قَتَلَ النَّاسَ جَمِيعًا﴾

آيتڭ معناىِ إشاريسيله: بر معصومڭ حقّى، بتون خلق ايچون دخى إبطال ايديلمز. بر فرد دخى، عمومڭ سلامتى ايچون فدا ايديلمز. جنابِ حقّڭ نظرِ مرحمتنده حق حقدر، كوچگنه بيوگنه باقيلماز. كوچك، بيوك ايچون إبطال ايديلمز. بر جماعتڭ سلامتى ايچون، بر فردڭ رضاسى بولونمه‌دن حياتى و حقّى فدا ايديلمز. حميت نامنه رضاسيله اولسه، او باشقه مسئله‌در.

عدالتِ إضافيه ايسه:

كلّڭ سلامتى ايچون، جزئى فدا ايدر. جماعت ايچون، فردڭ حقّنى نظره آلماز. أهون الشّر دييه بر نوع عدالتِ إضافيه‌يى ياپمغه چاليشير. فقط عدالتِ محضه قابلِ تطبيق ايسه، عدالتِ إضافيه‌يه گيدلمز، گيديلسه ظلمدر.

ايشته إمامِ على رضى اللّٰه عنه، عدالتِ محضه‌يى شَيخَيْن زماننده‌كى گبى قابلِ تطبيقدر دييوب، خلافتِ إسلاميه‌يى او أساس اوزرينه بنا ايدييوردى. مقابللرى و معارضلرى ايسه، "قابلِ تطبيق دگل، چوق مشكلاتى وار." دييه عدالتِ إضافيه اوزرينه إجتهاد ايتمشلر. تاريخڭ گوسترديگى سائر أسباب ايسه، حقيقى سبب دگللر، بهانه‌لردر.

أگر ديسه‌ڭ:

خلافتِ إسلاميه نقطه‌سنده إمامِ علىنڭ فوق العاده إقتدارى، خارق العاده ذكاسى و يوكسك لياقتيله برابر سلفلرينه نسبةً موفّقيتسزلگى نه‌دندر؟

الجواب:

او مبارك ذات، سياست و سلطنتدن زياده، داها چوق مهمّ باشقه وظيفه‌لره لايق ايدى. أگر تام موفّقيتِ سياسيه و تمام سلطنت اولسيدى، "شاهِ ولايت" عنوانِ معنيدارينى بِحقٍّ قزاناميه‌جقدى. حالبوكه ظاهرى و سياسى خلافتڭ پك چوق فوقنده معنوى بر سلطنت قزاندى و استادِ كلّ حكمنه گچدى· حتّى قيامته قدر سلطنتِ معنويسى باقى قالدى.