﴿بِسْمِ اللّٰهِ الرَّحْمٰنِ الرَّحِيمِ﴾

﴿وَ بِهِ نَسْتَعِينُ﴾

برنجى مكتوب

﴿بِاسْمِهِ سُبْحَانَهُ ٭ وَ اِنْ مِنْ شَيْءٍ اِلَّا يُسَبِّحُ بِحَمْدِهِ﴾

درت سؤالڭ مختصر جوابيدر

برنجى سؤال:

حضرتِ خضر عليه السلام حياتده ميدر؟ حياتده ايسه نيچون بعض مهمّ علما حياتنى قبول ايتمييورلر؟

الجواب:

حياتده‌در، فقط مراتبِ حيات بشدر. او، ايكنجى مرتبه‌ده‌در. بو سببدن بعض علما حياتنده شبهه ايتمشلر.

برنجى طبقهِٔ حيات:

بزم حياتمزدر كه، چوق قيدلرله مقيّددر.

ايكنجى طبقهِٔ حيات:

حضرتِ خضر و إلياس عليهما السلامڭ حياتلريدر كه، بر درجه سربستدر. يعنى بر وقتده پك چوق يرلرده بولونه‌بيليرلر. بزم گبى بشريت لوازماتيله دائمى مقيّد دگللردر. بعضًا ايستدكلرى وقت بزم گبى يرلر، ايچرلر· فقط بزم گبى مجبور دگللردر. تواتر درجه‌سنده أهلِ شهود و كشف اولان أوليانڭ، حضرتِ خضر ايله ماجرالرى، بو طبقهِٔ حياتى تنوير و إثبات ايدر. حتّى مقاماتِ ولايتده بر مقام واردر كه، "مقامِ خضر" تعبير ايديلير. او مقامه گلن بر ولى، خضردن درس آلير و خضر ايله گوروشور. فقط بعضًا او مقام صاحبى ياڭليش اولارق، عينِ خضر تلقّى اولونور.