ايكنجى مبحث:

اوننجى سوزڭ اوننجى حقيقتنده دينيلديگى گبى، بر آغاجڭ نه قدر ميوه‌لرى و چيچكلرى واردر· هر بر ميوه‌نڭ، هر بر چيچگڭ او قدر غايه‌لرى، حكمتلرى واردر. و او حكمتلر اوچ قسمدر. بر قسمى صانعه باقار، أسماسنڭ نقشلرينى گوسترر. بر قسمى ذىشعورلره باقار كه، اونلرڭ نظرلرنده قيمتدار مكتوبات و معنيدار كلماتدر. بر قسمى كندى نفسنه و حياتنه و بقاسنه باقار و إنسانه فائده‌لى ايسه إنسانڭ منفعتنه گوره حكمتلرى واردر. ايشته هر بر موجودڭ بويله كثرتلى غايه‌لرى بولونديغنى بر وقت دوشونوركن، خاطريمه عربى طرزده و گله‌جك بش إشارتڭ أساساتنه نوطه حكمنده اولارق، كلّى غايه‌لره إشارت ايدن شو فقره‌لر گلمشدر:

﴿وَ هٰذِهِ الْمَوْجُودَاتُ الْجَلِيَّةُ مَظَاهِرُ سَيَّالَةٌ وَ مَرَايَا جَوَّالَةٌ لِتَجَدُّدِ تَجَلِّيَاتِ اَنْوَارِ اِيجَادِهِ سُبْحَانَهُ بِتَبَدُّلِ التَّعَيُّنَاتِ اْلاِعْتِبَارِيَّةِ﴾

﴿اَوَّلاً: مَعَ اِسْتِحْفَاظِ الْمَعَانِى الْجَمِيلَةِ وَ الْهُوِيَّاتِ الْمِثَالِيَّةِ﴾

﴿وَ ثَانِيًا: مَعَ اِنْتَاجِ الْحَقَائِقِ الْغَيْبِيَّةِ وَ النُّسُوجِ اللَّوْحِيَّةِ﴾

﴿وَ ثَالِثًا: مَعَ نَشْرِ الثَّمَرَاتِ اْلاُخْرَوِيَّةِ وَ الْمَنَاظِرِ السَّرْمَدِيَّةِ﴾

﴿وَ رَابِعًا: مَعَ اِعْلَانِ التَّسْبِيحَاتِ الرَّبَّانِيَّةِ وَ اِظْهَارِ الْمُقْتَضَيَاتِ الْاَسْمَائِيَّةِ﴾

﴿وَ خَامِسًا: لِظُهُورِ الشُّؤُنَاتِ السُّبْحَانِيَّةِ وَ الْمَشَاهِدِ الْعِلْمِيَّةِ﴾

ايشته بو بش فقره‌ده، گله‌جكده بحث ايده‌جگمز إشاراتڭ أساساتى وار. أوت هر بر موجود (خصوصًا ذىحيات اولانلرڭ) بش طبقه آيرى آيرى حكمتلرى و غايه‌لرى وار. ناصلكه ميوه‌دار بر آغاج، بربرينڭ اوستنده‌كى داللرى ثمره ويرر· اويله ده: هر بر ذىحياتڭ، بش طبقه مختلف غايه‌لرى بولونور و حكمتلرى وار.