ايشته رسولِ أكرم عليه الصلاة والسلامڭ معجزاتِ باهره‌سى، هر بر نوعده قطعى اولارق موجوددر. جزئياتى دخى، او كلّى و مطلق معجزه‌نڭ صورتلرى وياخود نمونه‌لريدر. رسولِ أكرم عليه الصلاة والسلامڭ ناصلكه ألى، پارمقلرى، توكروگى، نَفَسى، سوزى يعنى دعاسى چوق معجزاتڭ مبدئى اولويور. عينًا اويله ده، رسولِ أكرم عليه الصلاة والسلامڭ سائر لطائفى و طويغولرى و جهازاتى، چوق خارقه‌لره مداردر. كتبِ سِيَر و تاريخ، او خارقه‌لرى بيان ايتمشلر· سيرت و صورت و طويغولرنده، چوق دلائلِ نبوّت بولونديغنى گوسترمشلر.

اون بشنجى إشارت:

ناصلكه طاشلر، آغاجلر، قمر، گونش اونى طانييورلر· برر معجزه‌سنى گوسترمكله، نبوّتنى تصديق ايدييورلر. اويله ده: حيوانات طائفه‌سى، ئولولر طائفه‌سى، جنلر طائفه‌سى، ملائكه‌لر طائفه‌سى او ذاتِ مباركى طانييورلر و نبوّتنى تصديق ايدييورلر كه· اونلر، اونى طانيدقلرينى، هر بر طائفه‌سى، بعض معجزاتنى گوسترمكله گوسترييورلر و نبوّتنڭ تصديقنى إعلان ايدييورلر. شو اون بشنجى إشارتڭ اوچ شُعْبه‌سى وار:

برنجى شُعْبه‌سى:

حيوانات جنسى، رسولِ أكرم عليه الصلاة والسلامى طانييورلر و معجزاتنى ده إظهار ايدييورلر. شو شعبه‌نڭ چوق مثاللرى وار. بز يالڭز بوراده، مشهور و معنوى تواتر درجه‌سنده قطعى اولمش ويا محقّقينِ أئمّه‌نڭ مقبولى اولمش ويا اُمّت تلقّئِ بِالقبول ايتمش اولان بر قسم حادثه‌لرى، نمونه اولارق ذكر ايده‌جگز: