اوچنجى مثال:

باشده نسائى اولارق أربابِ سِيَر، عثمان ابن حُنَيفدن خبر ويرييورلر كه: عثمان دييور كه: رسولِ أكرم عليه الصلاة والسلامڭ ياننه بر أعمٰى گلدى، ديدى: "بنم گوزلريمڭ آچيلمه‌سى ايچون دعا ايت." رسولِ أكرم عليه الصلاة والسلام اوڭا فرمان ايتدى:

﴿فَانْطَلِقْ وَ تَوَضَّاْ ثُمَّ صَلِّ رَكْعَتَيْنِ وَ قُلِ اللّٰهُمَّ اِنِّى اَسْئَلُكَ وَ اَتَوَجَّهُ اِلَيْكَ بِنَبِىِّ مُحَمَّدٍ نَبِىِّ الرَّحْمَةِ يَا مُحَمَّدُ اِنِّى اَتَوَجَّهُ بِكَ اِلٰى رَبِّكَ اَنْ يَكْشِفَ عَنْ بَصَرِى اَللّٰهُمَّ شَفِّعْهُ فِىَّ﴾

او گيتدى اويله ياپدى، گلدى. گوزى آچيلمش، گوزل گورييورمش، گوردك.

دردنجى مثال:

بيوك بر إمام اولان ابن وهب خبر ويرييور كه: غزوهِٔ بدرڭ اون درت شهيدندن بريسى اولان معوّذ ابن عفراء، أبو جهل ايله دوگوشوركن· أبو جهلِ لعين، او قهرمانڭ بر ألنى كسمش. او ده اوته‌كى أليله ألنى طوتوب، رسولِ أكرم عليه الصلاة والسلامڭ ياننه گلمش. رسولِ أكرم عليه الصلاة والسلام اونڭ ألنى ينه يرينه ياپيشديردى، توكروگنى اوڭا سوردى· بردن شفا بولدى. ينه حربه گيتدى، شهيد اولونجه‌يه قدر حرب ايتدى. هم ينه إمامِ جليل ابن وهب خبر ويرييور كه: او غزوه‌ده حُبَيب ابن يسافڭ اوموز باشنه بر قلنج وورولمش كه، بر شقّى آيريلمش گبى دهشتلى بر ياره آچيلمش. رسولِ أكرم عليه الصلاة والسلام اونڭ قولنى اوموزينه أليله ياپيشديرمش، نَفَس ايتمش· شفا بولمش. ايشته شو ايكى واقعه، چندان آحاديدر و خبرِ واحددر· فقط ابن وهب گبى بر إمام تصحيح ايتسه، غزوهِٔ بدر گبى بر منبعِ معجزات اولان بر غزوه‌ده اولسه، هم بو ايكى واقعه‌يى آڭديره‌جق چوق مثاللر بولونسه· ألبته شو ايكى واقعه، قطعى و واقعدر دينيله‌بيلير.

ايشته أحاديثِ صحيحه ايله ثبوت بولان بلكه بيڭ مثال وار كه، رسولِ أكرم عليه الصلاة والسلامڭ مبارك ألى اوڭا شفا اولمش.