اوننجى سوزڭ توافقاتندندر كه· اوننجى سوزڭ سطرلرى هم تأليف تاريخنه، هم دينى دنيادن تفريق ايدن لا دينى جمهوريتڭ إعلاننه توافق ايدييور كه، حشرڭ إنكارينه بر أماره‌در. يعنى او فقره‌نڭ مئالى بودر: "مادام جمهوريت دينه و دينسزلگه ايليشمييور، پرنسبيله بىطرفانه قالييور· أهلِ ضلالت و إلحاد، جمهوريتڭ بو بىطرفلغندن إستفاده ايتمكله، حشرڭ إنكارينى إظهار ايتمه‌لرى محتملدر." ديمكدر. يوقسه حكومته بر تعريض دگلدر· بلكه حكومتڭ بىطرفانه وضعيتنه إشارتدر. الحقّ، بوندن طوقوز سنه أوّل، اوننجى سوز سكز يوز نسخه‌سيله او زمان حكومتڭ مساعده‌سندن إستفاده ايدوب ياييلماسيله، أهلِ ضلالتڭ قلبلرنده‌كى إنكارِ حشرى قلبلرنده صيقيشديردى· لسانلرينه گتيرمه‌لرينه ميدان ويرمدى، آغزلرينى طيقادى. اوننجى سوزڭ خارقه برهانلرينى گوزلرينه صوقدى.

أوت اوننجى سوز، حشر گبى بر ركنِ عظيمِ ايمانڭ أطرافنده چليكدن بر سور اولدى و أهلِ ضلالتى صوصديردى. ألبته حكومتِ جمهوريه بوندن ممنون اولدى كه، مجلسده‌كى مبعوثانڭ و واليلرڭ و بيوك مأمورلرڭ أللرنده كمالِ سربستى ايله حكومتِ جمهوريه‌نڭ مساعده‌سندن إستفاده ايده‌رك گزدى.

ايشته شاپوغرافله سكز سنه أوّل مطبوع اوننجى سوزڭ ايكى صحيفه‌لك علاوه‌سى، ألبته نه بڭا و نه ده خسروه مدارِ مسئوليت اولاماز. چونكه هم او زمان ياساق دگلدى. هم ده اوندن صوڭره عفو قانونلرى چيقدى كه· دگل بونڭ گبى سينك قنادى قدر موهوم كوچك جُرملرى، بلكه حقيقى بيوك جُرملرى عفو ايتدى.

إدّعانامه‌ده تستّر رساله‌سى حقّنده أوّلجه إستنطاق دائره‌سنده ايضاحلى بر جواب ويرمكلگم ايله برابر، ينه شدّتلى و تنقيدكارانه بحث ايديلمش.