صوڭره بردن بريسى بڭا بر مكتوب ويردى. مكتوبى آچدم گوردم كه: عبد الرحمانڭ ماهيتنى تام گوسترر بر طرزده بر مكتوب كه، او مكتوبڭ بر قسمى يگرمى يدنجى مكتوبڭ فقره‌لرى ايچنده، اوچ ظاهر كرامتى گوسترر بر طرزده درج ايديلمشدر. او مكتوب بنى چوق آغلاتديرمش و الآن ده آغلاتديرييور. مرحوم عبد الرحمن او مكتوبله پك جدّى و صميمى بر صورتده· دنيانڭ أذواقندن نفرت ايتديگنى و أڭ بيوك مقصدى بڭا يتيشوب كوچكلگنده بنم اوڭا باقديغم گبى، او ده إختيارلغمده بڭا خدمت ايتمكدى. هم دنياده بنم حقيقى وظيفه‌م اولان نشرِ أسرارِ قرآنيه‌ده، مقتدر قلميله بڭا يارديم ايتمكدى. حتّى مكتوبنده يازييوردى: "يگرمى اوتوز رساله‌يى بڭا گوندر، هر بريسندن يگرمى اوتوز نسخه يازوب و يازديره‌جغم." دييوردى.

او مكتوب، بڭا دنيايه قارشى قوّتلى بر اُميد ويردى. دها درجه‌سنده ذكايه مالك و حقيقى أولادڭ چوق فوقنده بر صداقت و إرتباطله بڭا خدمت ايده‌جك بويله جسور بر طلبه‌مى بولدم دييه· او إشكنجه‌لى أسارتى، او كيمسه‌سزلگى، او غربتى، او إختيارلغى اونوتدم. او مكتوبدن أوّل ايمانِ بِالآخرته دائر طبع ايتديرديگم اوننجى سوزڭ بر نسخه‌سى ألنه گچمشدى. گويا او رساله اوڭا بر ترياق ايدى كه· آلتى يدى سنه ظرفنده آلديغى بتون معنوى ياره‌لرينى تداوى ايتدى. غايت قوّتلى و پارلاق بر ايمان ايله أجلنى بكله‌يور گبى بڭا او مكتوبى يازمش.