كوچكلكلرنده گوستردكلرى فوق العاده شفقت و أهمّيتِ عظيمه، يالڭز جبلّى شفقت و حسِّ قرابتدن گلن بر محبّت دگل، بلكه وظيفهِٔ نبوّتڭ بر خيطِ نورانيسنڭ بر اوجى و وراثتِ نبويه‌نڭ غايت أهمّيتلى بر جماعتنڭ منشئى، ممثّلى، فهرسته‌سى جهتيله‌در. أوت رسولِ أكرم عليه الصلاة والسلام، حضرتِ حسنى (رض) كمالِ شفقتندن قوجاغنه آلارق باشنى اوپمه‌سيله· حضرتِ حسندن (رض) تسلسل ايدن نورانى نسلِ مباركندن غوثِ أعظم اولان شاهِ گيلانى گبى چوق مهدىمثال ورثهِٔ نبوّت و حَمَلهِٔ شريعتِ أحمديه (عصم) اولان ذاتلرڭ حسابنه حضرتِ حسنڭ (رض) باشنى اوپمش و او ذاتلرڭ إستقبالده ايده‌جكلرى خدمتِ قدسيه‌لرينى نظرِ نبوّتله گوروب تقدير و إستحسان ايتمش و تقدير و تشويقه علامت اولارق حضرتِ حسنڭ (رض) باشنى اوپمش. هم حضرتِ حسينه قارشى گوستردكلرى فوق العاده أهمّيت و شفقت، حضرتِ حسينڭ (رض) سلسلهِٔ نورانيه‌سندن گلن زين العابدين، جعفرِ صادق گبى أئمّهِٔ عالىشان و حقيقى ورثهِٔ نبويه گبى پك چوق مهدىمثال ذواتِ نورانيه‌نڭ نامنه و دينِ إسلام و وظيفهِٔ رسالت حسابنه بويننى اوپمش، كمالِ شفقت و أهمّيتنى گوسترمشدر.

أوت ذاتِ أحمديه‌نڭ (عصم) غيبآشنا قلبيله، دنياده عصرِ سعادتدن أبد طرفنده اولان ميدانِ حشرى تماشا ايدن و يردن جنّتى گورن و زميندن گوكده‌كى ملائكه‌لرى مشاهده ايدن و زمانِ آدمدن بَرى ماضى ظلماتنڭ پرده‌لرى ايچنده گيزلنمش حادثاتى گورن، حتّى ذاتِ ذو الجلالڭ رؤيتنه مظهر اولان نظرِ نورانيسى، چشمِ إستقبالبينيسى، ألبته حضرتِ حسن و حسينڭ آرقه‌لرنده تسلسل ايدن أقطاب و أئمّهِٔ ورثه و مهديلرى گورمش و اونلرڭ عمومى نامنه باشلرينى اوپمش. أوت حضرتِ حسنڭ (رض) باشنى اوپمه‌سنده، شاهِ گيلانىنڭ حصّهِٔ عظيمه‌سى وار.