أوت چندان حضرتِ على (رض) خليفهِٔ بِالحق ايدى. فقط دوكولن قانلر چوق أهمّيتلى اولديغندن اُمّت نظرنده تبرئه‌سى و برائتى، وظيفهِٔ رسالت حسبيله أهمّيتلى اولديغندن، رسولِ أكرم عليه الصلاة والسلام، او صورتله اونى تبرئه ايدييور. اونى تنقيد و تخطئه و تضليل ايدن خارجيلرى و أمويلرڭ متجاوز طرفدارلرينى سكوته دعوت ايدييور. أوت خارجيلر و أمويلرڭ مفرط طرفدارلرى حضرتِ على (رض) حقّنده‌كى تفريطلرى و تضليللرى و حضرتِ حسينڭ (رض) غايت فجيع جگرسوز حادثه‌سيله شيعه‌لرڭ إفراطلرى و بدعه‌لرى و شَيْخَيْندن تبرّيلرى، أهلِ إسلامه چوق ضررلى دوشمشدر.

ايشته بو عبا و دعا ايله رسولِ أكرم عليه الصلاة والسلام، حضرتِ على (رض) و حضرتِ حسينى (رض) مسئوليتدن و إتهامدن و اُمّتنى اونلر حقّنده سوءِ ظندن قورتارديغى گبى، حضرتِ حسنى (رض) ياپديغى مصالحه ايله أمّته ايتديگى اييلگنى وظيفهِٔ رسالت نقطه‌سنده تبريك ايدييور و حضرتِ فاطمه‌نڭ (رض) ذرّيتنڭ نسلِ مباركى، عالمِ إسلامده أهلِ بيت عنواننى آلارق عالى بر شرف قزانه‌جقلرينى و حضرتِ فاطمه (رض)

﴿اِنِّى اُعِيذُهَا بِكَ وَذُرِّيَّتَهَا مِنَ الشَّيْطَانِ الرَّجِيمِ﴾

ديين حضرتِ مريمڭ والده‌سى گبى ذرّيتجه چوق مشرّف اولاجغنى إعلان ايدييور.

﴿اَللّٰهُمَّ صَلِّ عَلٰى سَيِّدِنَا مُحَمَّدٍ وَعَلٰى اٰلِهِ الطَّيِّبِينَ الطَّاهِرِينَ الْاَبْرَارِ وَعَلٰى اَصْحَابِهِ الْمُجَاهِدِينَ الْمُكْرَمِينَ الْاَخْيَارِ اٰمِينَ﴾

٭ ٭ ٭