قورتاروب بو دنياده بر گوزل دنيايى بڭا ويرديگى گبى، أجلم گلديگى زمان بنى إعدامِ أبدى اولان عدمدن و محودن ينه قورتاروب باقى بر عالمده أبدى و چوق شعشعه‌لى بر عالمى بڭا إحسان و او عالمڭ عموم أنواعِ لذائذ و محاسنندن إستفاده ايده‌جك و جولان ايدوب تنزّه ايده‌جك ظاهرى و باطنى حاسّه‌لرى، طويغولرى بڭا إنعام ايتديگى گبى، چوق سَوْديگم و چوق علاقه‌دار اولديغم بتون أقارب و أحباب و أبناىِ جنسمى دخى اويله حدسز إحسانلره مظهر ايدييور و او إحسانلر بر جهتده بڭا عائد اولويور. زيرا اونلرڭ سعادتلريله مسعود و متلذّذ اولويورم. مادام

﴿اْلاِنْسَانُ عَبِيدُ اْلاِحْسَانِ﴾

سرّيله، هركسده إحسانه قارشى پرستش وار. ألبته بويله حدسز أبدى إحساناته قارشى· كائنات قدر بر قلبم اولسه، او إحسانه قارشى محبّتله طولمق إقتضا ايدر و طولديرمق ايسترم. بن بِالفعل او محبّتى ايتمزسه‌م ده بِالإستعداد، بِالايمان، بِالنيّة، بِالقبول، بِالتقدير، بِالإشتياق، بِالإلتزام، بِالإراده صورتنده ايدييورم، دييه‌جك و هكذا... جمال و كماله قارشى إنسانڭ گوستره‌جگى محبّت ايسه، إجمالاً إشارت ايتديگمز إحسانه قارشى محبّته قياس ايديلسين. كافر ايسه، كفر جهتيله حدسز بر عداوت ايدر. حتّى كائناته و موجوداته قارشى ظالمانه و تحقيركارانه بر عداوت طاشييور.

ايكنجى نقطه:

محبّت اللّٰه، إتّباعِ سنّتِ محمّديه عليه الصلاة والسلامى إستلزام ايدر. چونكه اللّٰهى سومك، اونڭ مرضياتنى ياپمقدر. مرضياتى ايسه، أڭ مكمّل بر صورتده ذاتِ محمّديه‌ده (عصم) تظاهر ايدييور. ذاتِ أحمديه‌يه (عصم) حركات و أفعالده بڭزه‌مك، ايكى جهتله‌در:

بريسى: جنابِ حقّى سومك جهتنده أمرينه إطاعت و مرضياتى دائره‌سنده حركت ايتمك، او إتّباعى إقتضا ايدييور. چونكه بو ايشده أڭ مكمّل إمام، ذاتِ محمّديه‌در (عصم).