بو رساله‌يى گورن هر بر ذوقِ سليم أصحابى حيرتده قالمقله برابر كنديلرينڭ إستفاده‌لرندن باشقه، غيريلرينڭ ده إستفاده‌لرينه چاليشمايى لازم بولويورلر. خصوصًا ايكنجى برهانده بش نقطه بيان ايديلييور. عقلى چوروك، قلبى بوزوق اولميان، هر حالده تقدير و تحسين و تصويب ايله "مَا شَاءَ اللّٰه فَتَبَارَكَ اللّٰه" دييه‌جك· فقير، حقير گورولن وجودينى تعالى ايتديره‌جك خارقه بر معجزه اولديغنى درك و تصديق ايده‌جك.

حافظ حسين

بشنجى شعاع

اوتوز بش سنه أوّل طبع ايديلمش اولان محاكماتِ بديعيه‌يه تتمّه اولمق اوزره بر قسم مسودّه‌سى يازيلمش اولان و أشراطِ ساعتدن بحث ايدن بو شعاع، إحتوا ايتديگى حقيقتلريله چوق منكِرلرڭ آغزلرينى طيقامقده و چوق ملحدلرڭ قولاقلرينى چينلاتمقده و بر قسم أهلِ إنكارڭ عصرلردن بَرى إسلامڭ ماضيسنه إستحقارانه گوندردكلرى نظرلرينه مقابل ماضئِ إسلامه حيرتكارانه باقديرمقده و بيڭ اوچ يوز سنه‌دن بَرى هر عصرده ياشامش ميليونلرله مسلمانلرڭ لسانلرنده و مجلسلرنده متماديًا مدارِ بحث اولمش أشراطِ ساعتدن خبر ويرن إخباراتِ غيبيه‌يى بو زمانده تبلّور ايتديره‌رك إستحسانكارانه گوسترمكده و چوق إنسانلرڭ أگريلمش عقيده‌لرينى دوزلتمكده و إستقبال حادثاتنى حقيقتيله و غايت جدّى و لطيف بر اُسلوب ايله و غايت طوغرى اولارق هم پك جدّى بر صورتده إخبار ايتمكده و يالڭز ياڭليش تلقّى ايديلمك إحتمالندن طولايى هركسه گوستريلمسنه مساعده ايديلميه‌رك محرم طوتولمقده اولان غايت فيّاض بر رساله‌در.