بو شعاع

﴿فَقَدْ جَاءَ اَشْرَاطُهَا﴾

آيتنڭ بر نكته‌سى اولمقله برابر، بو زمانده عقيدهِٔ مسلمينى وقايه و شبهاتدن محافظه ايچون يازيلمش اولوب، آخر زمانده وقوعه گله‌جك حادثاته دائر روايت ايديلن حديثلرڭ بر قسمنڭ متشابهاتِ قرآنيه گبى درين معنالرى بولونديغندن، بو گبى حديثلرله إخبار ايديلن حادثات وقوعه گلدكدن صوڭره

﴿وَمَا يَعْلَمُ تَاْوِيلَهُ اِلَّا اللّٰهُ وَالرَّاسِخُونَ فِى الْعِلْمِ﴾

آيتنڭ بشارتيله علمده رسوخ صاحبى اولانلر تأويل ايله آڭلارلر و إظهار ايدرلر. او وقت معناىِ حديثڭ إخبار ايتديگى وقعه بيلينه‌بيلير و مقصد نه اولديغى آڭلاشيله‌بيلير.

بو شعاع، بر مقدّمه ايله يگرمى اوچ مسئله‌در. مقدّمه بش نقطه‌در.

برنجى نقطه:

ايمان و سرِّ تكليف إختيار دائره‌سنده بر إمتحان و بر تجربه اولديغى ايچون، پرده‌لى و درين و دقيق و تجربه‌يه محتاج اولان نظرى مسئله‌لر سرِّ تكليف بوزولمامق، هم بر سويه‌ده اولميان أبوبكرلرله أبوجهللر بربرندن آيريلمق ايچون ألبته بديهى اولاماز.

ايكنجى نقطه:

پيغمبر عليه الصلاة والسلامه بيلديريلن امورِ غيبيه‌نڭ بر قسمى تفصيل ايله‌در. پيغمبرِ ذىشان عليه الصلاة والسلام اونلره قاريشه‌ماز. قرآن و حديثِ قدسيلر گبى، عينًا تبليغ ايدر. ديگر قسمى إجمال ايله‌در. تفصيلات و تصويراتى پيغمبرِ ذىشانه (عصم) عائددر. هم حقائقِ ايمانيه‌يه گيرمه‌ين جزئى حادثاتِ إستقباليه نظرِ نبوّتده أهمّيتلى دگلدر.