امّا ايكنجى شق شبهه‌ڭ كه:

بعض أسباب، بعض جزئياتڭ بعض عبوديتلرينه مرجع اولسه، او معبودِ مطلق اولان ذاتِ واجب الوجوده متوجّه ذرّاتدن سيّاراته قدر مخلوقاتڭ عبوديتلرندن نه نقصان گلير؟

الجواب:

شو كائناتڭ خالقِ حكيمى كائناتى بر آغاج حكمنده خلق ايدوب، أڭ مكمّل ميوه‌سنى ذىشعور و ذىشعورڭ ايچنده أڭ جامع ميوه‌سنى إنسان ياپمشدر. و إنسانڭ أڭ أهمّيتلى، بلكه إنسانڭ نتيجهِٔ خلقتى و غايهِٔ فطرتى و ثمرهِٔ حياتى اولان شكر و عبادتى· او حاكمِ مطلق و آمرِ مستقل، كندينى سَوْديرمك و طانيتديرمق ايچون كائناتى خلق ايدن او واحدِ أحد، بتون كائناتڭ ميوه‌سى اولان إنسانى و إنسانڭ أڭ يوكسك ميوه‌سى اولان شكر و عبادتنى باشقه أللره ويرر مى؟ بتون بتون حكمتنه ضد اولارق، نتيجهِٔ خلقتى و ثمرهِٔ كائناتى عبث ايدر مى؟ حاشا و كلاّ... هم حكمتنى و ربوبيتنى إنكار ايتديره‌جك بر طرزده مخلوقاتڭ عبادتلرينى باشقه‌لره ويرمگه رضا گوسترر مى، هيچ مساعده ايدر مى؟ هم حدسز بر درجه‌ده كندينى سَوْديرمگى و طانيتديرمغى أفعاليله گوسترديگى حالده، أڭ مكمّل مخلوقاتنڭ شكر و منّتدارلقلرينى، تحبّب و عبوديتلرينى باشقه أسبابه ويرمكله كندينى اونوتديروب، كائناتده‌كى مقاصدِ عاليه‌سنى إنكار ايتديرر مى؟ أى طبيعتپرستلكدن واز گچن آرقداش! هايدى سن سويله!