منكِر و طبيعتپرست دييور كه: مادام بنى إنصافه دعوت ايدييورسڭ. بن ده دييورم كه: شيمدىيه قدر ياڭليش گيتديگمز يول، هم يوز درجه محال، هم غايت ضررلى و نهايت درجه‌ده چركين بر مسلك اولديغنى إعتراف ايدييورم. سابق تحقيقاتڭزدن ذرّه مقدار شعورى بولونان آڭلايه‌جق كه· أسبابه، طبيعته ايجاد ويرمك ممتنعدر، محالدر. و هر شيئى طوغريدن طوغرىيه واجب الوجوده ويرمك واجبدر، ضروريدر.

﴿اَلْحَمْدُ ِللّٰهِ عَلَى اْلاِيمَانِ﴾

دييوب ايمان ايدييورم.

يالڭز بر شبهه‌م وار. جنابِ حقّڭ خالق اولديغنى قبول ايدييورم· فقط بعض جزئى أسبابڭ أهمّيتسز شيلرده ايجاده مداخله‌لرى و بر پارچه مدح و ثنا قزانمه‌لرى، سلطنتِ ربوبيتنه نه ضرر ويرر؟ سلطنتنه نقصانيت گلير مى؟

الجواب:

بعض رساله‌لرده غايت قطعى إثبات ايتديگمز گبى· حاكميتڭ شأنى، مداخله‌يى ردّ ايتمكدر. حتّى أڭ أدنا بر حاكم، بر مأمور· دائرهِٔ حاكميتنده اوغلنڭ مداخله‌سنى قبول ايتمييور. حتّى حاكميتنه مداخله توهّميله، بعض ديندار پادشاهلر (خليفه اولدقلرى حالده) معصوم أولادلرينى قتل ايتمه‌لرى، بو "ردِّ مداخله قانونى"نڭ حاكميتده نه قدر أساسلى حكم ايتديگنى گوسترييور. بر ناحيه‌ده ايكى مديردن طوت، تا بر مملكتده ايكى پادشاهه قدر، حاكميتده‌كى إستقلاليتڭ إقتضا ايتديگى "منعِ إشتراك قانونى" تاريخِ بشرده چوق عجيب هرج و مرج ايله قوّتنى گوسترمش. عجبا عاجز و معاونته محتاج إنسانلرده‌كى آمريت و حاكميتڭ بر گولگه‌سى، بو درجه مداخله‌يى ردّ ايتمگى و باشقه‌سنڭ مداخله‌سنى منع ايتمگى و حاكميتنده إشتراك قبول ايتمه‌مگى و مقامنده إستقلاليتنى نهايت تعصّبله محافظه‌يه چاليشمايى گور· صوڭره حاكميتِ مطلقه ربوبيت درجه‌سنده و آمريتِ مطلقه الوهيت درجه‌سنده و إستقلاليتِ مطلقه أحديت درجه‌سنده و إستغناىِ مطلق قادريتِ مطلقه درجه‌سنده بر ذاتِ ذو الجلالده، بو ردِّ مداخله و منعِ إشتراك و طردِ شريك، نه درجه او حاكميتڭ ضرورى بر لازمى و واجب بر مقتضاسى اولديغنى قياس ايده‌بيليرسه‌ڭ ايت.