هم زمانِ سعادتدن شيمدىيه قدر هيچ بر تاريخ بزه بيلديرمييور كه· بر مسلمان محاكمهِٔ عقليه‌سيله باشقه بر دينى، إسلاميته ترجيح ايتمش اولسون و دليل ايله باشقه بر دينه داخل اولمش اولسون. ديندن چيقانلر وار، او باشقه مسئله.. تقليد ايسه، أهمّيتسزدر. حالبوكه أديانِ سائره منتسبلرى مطلقا فوج فوج، محاكمهِٔ عقليه ايله و برهانِ قطعى ايله دائرهِٔ إسلاميته داخل اولمشلر و اولمقده‌درلر. أگر بز، طوغرى إسلاميتى و إسلاميته لايق طوغريلغى و إستقامتى گوسترسه‌ك، بوندن صوڭره اونلردن فوج فوج داخل اولاجقلردر.

هم ده تاريخ بزه بيلديرييور كه: أهلِ إسلامڭ تمدّنى، حقيقتِ إسلاميته إتّباعلرى نسبتنده‌در. باشقه‌لرينڭ تمدّنى ايسه، دينلريله معكوسًا متناسبدر. هم ده حقيقت بزه بيلديرييور كه: مُتَنَبِّهْ اولان بشر، دينسز اولاماز. لاسيّما اويانمش، إنسانيتى طاتمش، مستقبله و أبده نامزد اولمش آدم دينسز ياشايامز. زيرا اويانمش بر بشر، كائناتڭ تهاجمنه قارشى إستناد ايده‌جك و غيرِ محدود آمالنه (أمللرينه) نشو و نما ويره‌جك و إستمدادگاهى اولاجق نقطه‌يى (يعنى دينِ حق اولان دانهِٔ حقيقتى) ألده ايتمزسه ياشاماز. بو سردندر كه· هركسده دينِ حقّى بولمق ايچون بر مَيلِ تحرّى اويانمشدر. ديمك إستقبالده نوعِ بشرڭ دينِ فطريسى إسلاميت اولاجغنه براعت الإستهلال واردر.

أى إنصافسزلر! عموم عالمى يوته‌جق، برلشديره‌جك، بسله‌يه‌جك، ضيالانديره‌جق بر إستعدادده اولان حقيقتِ إسلاميتى ناصل طار بولديڭز كه، فقرايه و متعصّب بر قسم خواجه‌لره تخصيص ايدوب، إسلاميتڭ يارى أهلنى طيشارىيه آتمق ايسته‌يورسڭز. هم ده، عموم كمالاتى جامع و بتون نوعِ بشرڭ حسّياتِ عاليه‌سنى بسله‌يه‌جك موادّى محيط اولان او قصرِ نورانئِ إسلاميتى، نه جرئتله ماتم طوتمش بر سياه چادير گبى بر قسم فقرايه و بدويلره و مرتجعلره خاص اولديغنى تخيّل ايدييورسڭز؟ أوت هركس آيينه‌سنڭ مشاهداتنه تابعدر. ديمك سزڭ سياه و يالانجى آيينه‌ڭز سزه اويله گوسترمشدر.