بونى ده سويله‌يورم كه: حميتلى و منوّر الفكر بر ضابطى ضايع ايتمك، معنوى قوّتڭزى ضايع ايتمكدر. زيرا شيمدى حكمفرما، شجاعتِ ايمانيه و عقليه و فنّيه‌در. بعضًا بر منوّر الفكر، يوزه مقابلدر. أجنبيلر سزه بو شجاعتله غلبه‌يه چاليشييورلر. يالڭز شجاعتِ فطريه كافى دگل...

الحاصل: فخرِ عالمڭ فرماننى سزه تبليغ ايدييورم كه: إطاعت فرضدر. ضابطڭزه عصيان ايتمه‌يڭز. ياشاسين عسكرلر!.. ياشاسين مشروطهٔ مشروعه!..

ديمك كه بن، بو قدر عالم واركن، بويله مهمّ وظيفه‌لرى درعهده ايتديگمدن جنايت ايتدم!..

اون برنجى جنايت:

بن ولاياتِ شرقيه‌ده عشيرتلرڭ حالِ پريشانيتنى گورويوردم. آڭلادم كه: دنيوى سعادتمز، بر جهتله فنونِ جديدهِٔ مدنيه ايله اولاجق. او فنونڭ ده غيرِ متعفّن بر مجراسى علما و بر منبعى ده مدرسه‌لر اولمق لازمدر. تا علماءِ دين، فنون ايله اُنسيت پيدا ايتسين.

زيرا، او ولاياتده يارى بدوى وطنداشلرڭ زمامِ إختيارى، علما ألنده‌در. و او سائق ايله درسعادته گلدم. سعادت توهّمى ايله او وقتده (شيمدى منقسم اولمش، شدّتلنمش اولان) إستبدادلر، مرحوم سلطانِ مخلوعه إسناد ايديلديگى حالده· اونڭ ضبطيه ناظرى ايله بڭا ويرديگى معاش و إحسانِ شاهانه‌سنى قبول ايتمدم، ردّ ايتدم. خطا ايتدم. فقط او خطام، مدرسه علمى ايله دنيا مالنى ايسته‌ينلرڭ ياڭليشلرينى گوسترمكله خير اولدى. عقلمى فدا ايتدم، حرّيتمى ترك ايتمدم. او شفقتلى سلطانه بوين أگمه‌دم. شخصى منفعتمى ترك ايتدم.

شيمديكى سيورىسينكلر بنى جبرله دگل، محبّتله كنديلرينه متّفق ايده‌بيليرلر. بر بچق سنه‌در بوراده مملكتمڭ نشرِ معارفى ايچون چاليشييورم. إستانبولڭ أكثريسى بونى بيلير.