پك مبارك قلبى، روحى، سرّى دوستم! بيلمم، عبدِ عاجزى خاطرلاديڭز مى؟ هر إحتماله قارشى خاطرلاته‌يم: يوردڭ هر طرفنده مجاهدهِٔ ملّيه دوام ايدركن ذاتِ حكيمانه‌لرينه، آنقره‌ده مجاهدهِٔ ملّيه‌يه برلكده دوامى متضمّن، مختلف أشخاصدن اون سكزى متجاوز دعوتنامه‌لر گلديگى زمان، بو دعوتلره إجابت ايدوب ايتمه‌مك خصوصنده إستانبولده إقامتگاهڭزده بَيْنمزده تقرّر ايدن گونده بولوشارق إستشاره بيورديغڭز آلاى مفتيلرندن دوستِ قديمڭز آنقره‌لى عثمان نورىيم. صوڭ زمانلرده ملّى مدافعه وكالتى مفتيلگنه تعيين اولوندم. ٥٢ سنه‌يه قريب بوراده مفتيلك ياپدم. اوچ سنه أوّل تقاعد اولدم. شيمدى آنقره‌ده أويمده إقامت ايدييورم. ذاتڭزه و أهلِ إنسان و إسلامه ليل و نهار دعا ايله إمرارِ حيات أيله‌يورم. أڭ بيوك أملم و آرزوم، ئولمه‌دن أوّل، دنيا گوزيله ذاتڭزى گورمك و زيارت ايتمك، حسبةً ِللّٰه بر صحبتڭزده بولونمقدر. بونى جان و گوڭلدن آرزو أيله‌يورم.

عزيزلرڭ عزيزى عزيزم! كمالِ تعظيمات و تكريماتله ذاتِ حكيمانه‌لريڭزى و طلبهِٔ نوريه‌لريڭزى عشق و شوق ايله سلاملر و خاطرلر، ايكى جهانده عزيز اولمالرينى و اولماڭزى حق تعالى و تقدّس حضرتلرندن تضرّع و نياز أيلرز. پك مبارك أللريڭزدن حسرت و إشتياقله تقبيل أيلر، دعاىِ إخلاصيه‌لريڭى و جوابِ صوابلريڭزى بكلر، اللّٰهه أمانت أيلرم، بزم بر دانه صاحب النّور و العزم و الإراده و الإرشاد أفنديمز حضرتلرى.

اَلْبَاقِى هُوَ اللّٰه

يارِ غارڭز، منتهاىِ ذروهٔ هيچيده بريجك عبدِ غُبار

عثمان نورى

٭ ٭ ٭