إستانبول خاخام باشيسى يهودى قراصّو ايله بديع الزمان آراسنده سلانيكده جريان ايدن بر قونوشمه صيره‌سنده، قراصّو قونوشمه‌يى ياريده بيراقه‌رق طيشارىيه فيرلامش و آرقداشلرينه: "أگر ياننده برآز داها قالسه ايدم، آز قالسين بنى ده مسلمان ايده‌جك ايدى." دييه‌رك مغلوبيتنى حيرت و تلاشله إظهار ايتمشدر. قراصّو كه، عثمانلى ايمپراطورلغنى پارچه‌لامق ايچون سينسى و ترتيبلى بر شكلده چاليشان گيزلى بر تشكيلاته منسوب اولوب، اورته‌ده فوق العاده بر رول اوينايوردى. قراصّونڭ بديع الزمانى زيارت ايتمكدن مقصدى، اونى كندى فكرينه چويرمك و مشئوم غايه‌سنه آلَت ايتمك ايدى. فقط هيهات!...

٭ ٭ ٭

نهايت منحوس ١٣ مارت حادثه‌سى ميدانه گلير. شريعت ايسته‌ين و او حادثه‌ده إسمى قاريشان اون بش قدر خواجه إعدام ايديلير. بديع الزمان، اونلر محكمه بناسنڭ باغچه‌سنده آصيلى طوردقلرى و كنديسى ده پنجره‌دن اونلرى گورديگى بر حالده محاكمه اولونور. محكمه رئيسى خورشيد پاشا صورار:

– سن ده شريعت ايسته‌مشسڭ؟

بديع الزمان جواب ويرر:

– شريعتڭ بر حقيقتنه، بيڭ روحم اولسه فدا ايتمگه حاضرم. زيرا شريعت، سببِ سعادت و عدالتِ محض و فضيلتدر. فقط إختلالجيلرڭ ايسته‌يشى گبى دگل!

بديع الزمانڭ ديوانِ حربده‌كى بو قهرمانجه مدافعه‌سى، او زمان ايكى دفعه طبع ايديلوب نشر ايديلمشدر. او دهشتلى محكمه‌دن إعدامنى بكلركن برائت ايتمش و محكمه‌يه تشكّر ايتميه‌رك، يولده بايزيددن تا سلطان أحمده قدر آرقه‌سنده غلبه‌لك بر خلق كتله‌سى موجود اولديغى حالده: "ظالملر ايچون ياشاسين جهنّم! ظالملر ايچون ياشاسين جهنّم!" ندالريله ايلرله‌مشدر.

ديوانِ حربده‌كى مدافعه‌سنڭ بر قسمى بو تاريخچهٔ حياتده يازيلمشدر. تا كه ١٣ مارت حادثه‌سنڭ ايچ يوزى و بديع الزمانڭ قهرمانجه مدافعه‌سى بر درجه آڭلاشيله‌بيلسين.

٭ ٭ ٭