....

بو دفعه تعرّض پك گنيش دائره‌ده.. رئيسِ حكومت و حاضر قبينه، پلانلى و دهشتلى بر أوهام ايله هجوم ايتدى. بنم آلديغم بر خبره گوره و چوق أماره‌لرله گيزلى منافقلرڭ يالان ژورناللرى و دسيسه‌لريله بزى خلافت قوميته‌سيله و نقشى طريقتنڭ گيزلى جمعيتيله تام علاقه‌دار، بلكه پيشدار گوستروب حكومتى بيوك بر تلاشه سَوق ايده‌رك، نورڭ بيوك مجموعه‌لرينڭ إستانبولده جلدله‌نوب عالمِ إسلامده إنتشارينى و عنايت و مقبوليتلرينى بر دليل گوستروب، حكومتى قورقوتوب، قيصقانج رسمى خواجه‌لرى و وهّام مأمورلرى عليهمزه إنصافسزجه چويرديلر. تخمينلرنجه هر حالده چوق وثيقه‌لر، أماره‌لر گوروله‌جك، هم أسكى سعيد طماريله تحمّل ايتميه‌رك اورته‌لغى قاريشديره‌جق دييه قناعتلرى وارمش. جنابِ حقّه حدسز شكر اولسون، او مصيبتى بيڭدن بره اينديردى. بتون تحرّيلرده هيچ بر جمعيت و قوميته‌لرله بر علاقه‌مزى بولامديلر. يوقدر كه، بولسونلر. اونڭ ايچون صاوجى إفترالره و ياڭليش معنالره، مدارِ مسئوليت اولميان جزئى إسنادلره مجبور اولمش. مادام حقيقت بودر، نورلر و بز يوزده طقسان طوقوز درجه مصيبتدن خلاص اولدق. اويله ايسه دگل شكوا، بلكه بيڭلر شكر ايتمكله عنايتِ إلٰهيه‌نڭ بو جلوه‌سنڭ تمامنى صبر، شكر، إسترحامله بكله‌ملىيز و نور درسلريله بو مدرسه‌نڭ متماديًا چيقان و گيرن محتاج و مشتاقلرينه تسلّى ويره‌رك يارديم ايتملىيز.

سعيد النورسى

٭ ٭ ٭