﴿بِاسْمِهِ سُبْحَانَهُ﴾

عزيز، صدّيق قارداشلرم!

بوگون بنم پنجره‌لريمى ميخلامالرينڭ سببى، محبوسلرله معارفه و سلاملاشمامقدر. ظاهرده باشقه بهانه گوسترديلر. هيچ مراق ايتمه‌يڭز. بِالعكس بنم أهمّيتسز شخصم ايله مشغول اولوب نورلره و طلبه‌لرينه چوق صيقنتى ويرمدكلرندن، بنم جدًّا و قلبًا اونلرڭ شخصمى إهانتلر و إشكنجه‌لرله تعذيب ايتمه‌لرى، نورلرڭ و سزلرڭ بدلنه اولديغى و بر درجه نورلره ايليشمه‌ملرى جهتنده ممنونم و صبر ايچنده شكر ايدرم، مراق ايتمييورم. سز دخى هيچ متأثّر اولمايڭز. گيزلى دشمنلريمز مأمورلرڭ نظرِ دقّتنى شخصمه چويرمه‌سندن، نورلرڭ و طلبه‌لرينڭ سلامت و مصلحتلرى نقطه‌سنده بر عنايت و بر خير وار دييه قناعتم وار. بعض قارداشلريمز حدّت ايدوب طوقوناقلى قونوشماسينلر، هم إحتياطله حركت ايتسينلر و تلاش ايتمه‌سينلر، هم هركسه بو مسئله‌دن بحث آچماسينلر. چونكه صافدل قارداشلريمز و إحتياطه داها آليشميان يڭى قارداشلريمزڭ سوزلرندن معنا چيقاران جاسوسلر بولونور. حبّه‌يى قبّه ياپار، إخبار ايده‌بيلير. شيمدى وضعيتمز شاقه قالديرمييور. بونڭله برابر هيچ أنديشه ايتمه‌يڭز. بز عنايتِ إلٰهيه آلتنده‌يز و بتون مشقّتلره قارشى كمالِ صبرله بلكه شكرله مقابله ايتمگه عزم ايتمشز. بر درهم زحمت، بر بطمان رحمت و ثوابى نتيجه ويرديگندن، شكر ايتمگه مكلّفز.

سعيد النورسى

٭ ٭ ٭