عجبا بر نطق ايله، عصيان ايدن سكز طابورى إطاعته گتيرن و قرق سنه أوّل بر مقاله‌سيله بيڭلر آدمى كندينه طرفدار ياپان و مذكور اوچ دهشتلى قوماندانلره قارشى قورقميان و دالقاووقلق ياپميان و محكمه‌لرده، باشمده‌كى صاچلرم عددنجه باشلرم بولونسه و هر گون برى كسيلسه، زندقه‌يه و ضلالته تسليمِ سلاح ايدوب وطن و ملّت و إسلاميته خيانت ايتمه‌م، حقيقتِ قرآنه فدا اولان بو باشمى ظالملره أگمه‌م ديين و أميرطاغنده بش اون آخرت قارداشى و اوچ درت خدمتجيلردن باشقه كيمسه ايله علاقه‌دار اولميان بر آدم حقّنده، إتهامنامه‌ده: "بو سعيد أميرطاغنده گيزلى چاليشمش، آسايشه ضرر ويرمك فكريله اوراده بر قسم خلقلرى زهرله‌مش، يگرمى آدم ده أطرافنده اونى مدح ايدوب خصوصى مكتوبلر يازدقلرى گوسترييور كه، او آدم إنقلاب و حكومت عليهنده گيزلى بر سياست چويرييور." دييه‌رك أمثالسز بر عداوت و إهانتلرله ايكى سنه حپسه صوقمق و حپسده تجريدِ مطلق ايله و محكمه‌ده قونوشديرمامقله تعذيب ايدنلر نه درجه حقدن و عدالتدن و إنصافدن اوزاق دوشدكلرينى وجدانلرينه حواله ايدييورم.

هيچ ممكن ميدر كه، بويله حدّندن يوز درجه زياده توجّهِ عامّه‌يه مظهر و بر نطق ايله بيڭلر آدمى إطاعته گتيرن و بر مقاله ايله بيڭلرله إنسانلرى إتّحادِ محمّدى (عصم) جمعيتنه إلتحاق ايتديرن و آياصوفيه جامعنده أللى بيڭ آدمه تقدير ايله نطقنى ديڭلتديرن بر آدم، اوچ سنه أميرطاغنده چاليشسين، يالڭز بش اون آدمى قانديرسين و آخرت ايشنى بيراقوب سياست أنتريقه‌لرى ايله اوغراشسين. ياقين اولديغى قبرينه نورلر يرينه لزومسز ظلمتلر طولديرسون. هيچ قابل ميدر؟ ألبته شيطان دخى بونى كيمسه‌يه قبول ايتديره‌مز.