الحاصل· مادام بز أهلِ دنيانڭ دنيالرينه ايليشمييورز، اونلر ده بزم آخرتمزه و ايمانى خدمتمزه بو درجه ايليشمه‌سينلر.

أوت، بز بر جماعتز. هدفمز و پروغراممز أوّلا كنديمزى، صوڭره ملّتمزى إعدامِ أبديدن و دائمى، برزخى حپسِ منفرددن قورتارمق و وطنداشلريمزى آنارشيلكدن و سرسريلكدن محافظه ايتمك و ايكى حياتمزى إمحايه وسيله اولان زندقه‌يه قارشى رسالهِٔ نورڭ چليك گبى حقيقتلريله كنديمزى محافظه‌در.

بن، سزڭ بڭا ويره‌جگڭز أڭ آغير جزاڭزه ده بش پاره ويرمم و هيچ أهمّيتى يوق. چونكه بن قبر قپوسنده، يتمش بش ياشنده‌يم. بويله مظلوم و معصوم بر ايكى سنه حياتى، شهادت مرتبه‌سيله دگيشديرمك، بنم ايچون بيوك سعادتدر. رسالهِٔ نورڭ بيڭلر حجّتلريله قطعى ايمانم وار كه· ئولوم بزم ايچون بر ترخيص تذكره‌سيدر. أگر ظاهرى إعدام ده اولسه، بزم ايچون بر ساعت زحمت، أبدى بر سعادتڭ و رحمتڭ آناختارى اولور. فقط سز أى گيزلى دشمنلر و زندقه حسابنه عدليه‌يى شاشيرتان، حكومتى بزمله سببسز مشغول ايدن إنصافسزلر! قطعى بيليڭز و تيتره‌يڭز كه· سز إعدامِ أبدى ايله أبدى محكوم اولويورسڭز. إنتقاممزى سزدن پك چوق مضاعف بر صورتده آلينييور گورويورز. حتّى سزه آجييورز. أوت بو شهرى يوز دفعه مزارستانه بوشالتان ئولوم حقيقتنڭ ألبته حياتدن زياده بر ايستديگى وار. و اونڭ إعدامندن قورتولمق چاره‌سى، إنسانلرڭ هر مسئله‌سنڭ فوقنده أڭ بيوك و أڭ أهمّيتلى و أڭ لزوملى بر إحتياجِ ضروريسى و قطعيسيدر. عجبا بو چاره‌يى كندينه بولان رسالهِٔ نور شاكردلرينى و او چاره‌يى بيڭلر حجّتلريله بولديران رسالهِٔ نورى، عادى بهانه‌لرله إتهام ايدنلر نه قدر كنديلرى حقيقت و عدالت نظرنده متّهم اولويور، ديوانه‌لر ده آڭلار.