إستانبولده غروپ غروپ گلن علمانڭ سؤاللرينى جوابلانديرييوردى. گنج ياشنده بويله بِلا إستثنا بتون سؤاللره جواب ويرمه‌سى و غايت مقنع و بليغ إفاده و خارقه حال و طورلريله، أهلِ علمى حيرانلقله تقديره سَوق ايدييوردى. و "بديع الزمان" عنواننه بِحقّ لايق گورويورلر و بو فوق العاده ذاتى، بر "نادرهٔ خلقت" اولارق توصيف ايدييورلردى.

حتّى بو زمانلرده مصر جامع الأزهر اونورسيته‌سى رئيسلرندن مشهور شيخ بخيت أفندى إستانبوله بر سياحت ايچون گلديگنده· كردستانڭ صارْپ، يالچين قيالرى آراسندن گله‌رك إستانبولده بولونان بديع الزمان سعيد النورسىيى إلزام ايده‌مه‌ين إستانبول علماسى، شيخ بخيتدن بو گنج خواجه‌نڭ إلزام ايديلمه‌سنى ايسترلر. شيخ بخيت ده بو تكليفى قبول ايده‌رك بر مناظره زمينى آرار. و بر نماز وقتى آياصوفيه جامعندن چيقوب چاىخانه‌يه اوطوريلديغنده بونى فرصت تلقّى ايدن شيخ بخيت أفندى، ياننده علما حاضر بولونديغى حالده بديع الزمانه خطابًا:

﴿مَا تَقُولُ فِى حَقِّ الْاَوْرُوبَائِيَّةِ وَ الْعُثْمَانِيَّةِ﴾

يعنى: " آوروپا و عثمانليلر حقّنده نه دييورسڭز، فكريڭز نه‌در؟" دير.

شيخ بخيت أفندينڭ بو سؤالدن مقصدى· بديع الزمانڭ شكّ اولميان بر بحرِ عمّان گبى علمنى و آتشپارهِٔ ذكاسنى تجربه ايتمك دگل، بلكه زمانِ إستقباله عائد شدّتِ إحاطه‌سنى و إدارهِٔ عالمده‌كى سياستنى آڭلامق ايدى. بوڭا قارشى بديع الزمانڭ ويرديگى جواب شو اولدى:

﴿اِنَّ الْاَوْرُوبَا حَامِلَةٌ بِاْلاِسْلَامِيَّةِ فَسَتَلِدُ يَوْمًا مَا﴾

﴿وَ اِنَّ الْعُثْمَانِيَّةَ حَامِلَةٌ بِالْاَوْرُوبَائِيَّةِ فَسَتَلِدُ يَوْمًا مَا﴾