ايشته بو سرِّ شفقت ايچوندر كه· إداره و آسايشه قطعيًا ايليشمديگم گبى، بتون آرقداشلريمه ده او درجه توصيه ايتمشم كه، اوچ ولايتڭ إنصافلى ضابطه‌لرينڭ بر قسمى إعتراف ايتمشلر كه: "بو نور شاكردلرى معنوى بر ضابطه‌در· إداره و آسايشى محافظه ايدييورلر." ديدكلرى و بو حقيقته بيڭلر شاهد و يگرمى سنه حياتيله تصديق و بيڭلر شاكردلرنده ضابطه‌جه هيچ بر وقوعات قيد ايتمه‌مسى ايله تصديق و تأييد ايتدكلرى حالده، او بيچاره آدمڭ إختلالجى و إنصافسز بر قوميته‌جى گبى منزلنى باصمق و إنصافسز آدملر اوڭا إهانت ايتمك و منزلنده بر شى بولونمامقله برابر، يوز جنايتى بولونان بر آدم گبى حتّى قرآنى و باشنده‌كى لوحه‌لرينى أوراقِ مضرّه گبى طوپلامق، عجبا دنياده هانگى قانون مساعده ايدر؟

آلتنجيسى:

بوندن اوتوز سنه أوّل، جنابِ حقّڭ عنايتيله دنيانڭ موقّت شان و شرفنڭ و أنانيتلى خودفروشلق و شهرتپرستلگڭ نه قدر ضررلى و نه قدر فائده‌سز و معناسز اولديغنى حدسز شكر اولسون كه، قرآنڭ فيضيله آڭلامش بر آدم، او زماندن بَرى بتون قوّتيله نفسِ أمّاره‌سيله مجادله ايدوب، محويتله بنلگى بيراقمق و تصنّع و رياكارلق ياپمامق ايچون، ألدن گلديگى قدر چاليشديغنه اوڭا خدمت ويا آرقداشلق ايدنلر قطعى بيلدكلرى و شهادت ايتدكلرى حالده و يگرمى سنه‌دن بَرى هركس كندى حقّنده خوشلانديغى زياده حسنِ ظن و توجّهِ ناس و شخصنى مدح و ثنادن و كندينى معنوى مقام صاحبى اولديغنى بيلمكدن هركسه مخالف اولارق بتون قوّتيله قاچماسى و هم خاص قارداشلرينڭ اونڭ حقّنده‌كى حسنِ ظنلرينى ردّ ايدوب او خالص قارداشلرينڭ خاطرلرينى قيرماسى و يازديغى جوابى مكتوبلرنده اونلرڭ اونڭ حقّنده مدحلرينى و زياده حسنِ ظنلرينى قيرماسى و كندينى فضيلتدن محروم گوستروب بتون فضيلتى قرآنڭ تفسيرى اولان رسالهِٔ نوره و طولاييسيله نور شاكردلرينڭ شخصِ معنويسنه ويروب كندينى عادى بر خدمتكار بيلمسى قطعى إثبات ايدييور كه· شخصنى بگنديرمگه چاليشمديغى و ايسته‌مديگى و ردّ ايتديگى حالده، اونڭ رضاسى اولمادن بعض دوستلرى اوزاق بر يردن اونڭ حقّنده زياده حسنِ ظن ايدوب مدح ايده‌رك بر مقام ويرمه‌سى و كوتاهيه حواليسنده طانيمديغى بر واعظڭ بعض سوزلريله عجبا هانگى قانونله مدارِ مسئوليت اولور كه، او بيچاره و خسته و چوق إختيار و غريب و منزوينڭ اوطه‌سنه بيوك بر جنايت ايشله‌مش گبى كليدينى قيروب تحرّى مأمورلرينى صوقمق، هم أورادندن و لوحه‌لرندن باشقه بر بهانه ده بولمامق· عجبا دنياده هيچ بر قانون و هيچ بر سياست بو تعرّضه مساعده ايدر مى؟