ايشته شيمدى گيزلى منافقلر، وهّابيلك طماريله أڭ زياده إسلاميتى و حقيقتِ قرآنيه‌يى محافظه‌يه مأمور و مكلّف اولان بر قسم خواجه‌لرى ألده ايدوب، أهلِ حقيقتى عَلَويلكله إتهام ايتمكله بربرى عليهنده إستعمال ايده‌رك دهشتلى بر ضربه‌يى، إسلاميته وورمغه چاليشانلر ميدانده گزييورلر. سن ده بر پارچه‌سنى مكتوبڭده يازييورسڭ. حتّى سن ده بيلييورسڭ· بنم و رسالهِٔ نورڭ عليهنده إستعمال ايديلن أڭ تأثيرلى واسطه‌يى، خواجه‌لردن بولمشلر. شيمدى حرمينِ شريفَيْنه حكم ايدن وهّابيلر و مشهور، دهشتلى داهيلردن ابن تيميه و ابن القيّم الجوزينڭ پك عجيب و جاذبه‌دار أثرلرى إستانبولده چوقدن بَرى خواجه‌لرڭ ألنه گچمه‌سيله، خصوصًا أوليالر عليهنده و بر درجه بدعه‌لره مساعده‌كار مشربلرينى كنديلرينه پرده ياپمق ايسته‌ين، بدعه‌لره بولاشمش بر قسم خواجه‌لر، سزڭ محبّتِ آلِ بيتدن گلن و شيمدى إظهارى لازم اولميان إجتهاديڭزى وسيله ايده‌رك هم سڭا، هم نور شاكردلرينه ضربه وورابيليرلر. مادام ذمّ ايتمه‌مك و تكفير ايتمه‌مكده بر أمرِ شرعى يوق، فقط ذمده و تكفيرده حُكمِ شرعى وار. ذمّ و تكفير، أگر حقسز اولسه، بيوك ضررى وار· أگر حقلى ايسه، هيچ خير و ثواب يوق. چونكه تكفيره و ذمّه مستحق حدسزدرلر. فقط ذمّ ايتمه‌مك، تكفير ايتمه‌مكده هيچ بر حُكمِ شرعى يوق، هيچ ضررى ده يوق. ايشته بو حقيقت ايچوندر كه· أهلِ حقيقت، باشده أئمّهِٔ أربعه و أهلِ بيتڭ أئمّهِٔ إثنا عشر اولارق أهلِ سنّتڭ، مذكور حقيقته مستند اولان قانونِ قدسيه‌يى كنديلرينه رهبر ايدوب، إسلاملر ايچنده او أسكى زمان فتنه‌لرندن مدارِ بحث و مناقشه ايتمه‌يى جائز گورمه‌مشلر· منفعتسز، ضررى وار ديمشلر.