بڭا بو إهانتلرى ياپانلرڭ هيچ بر بهانه‌لرى يوقدر. يالڭز توجّهِ عامّه‌يى بهانه ايدوب: "بو منفى آدمه نه‌دن حرمت ايدييورسڭز؟" بن ده ديرم:

بتون دوستلرم بيلييورلر كه· بن، شخصمه قارشى حرمتى و توجّهِ عامّه‌يى ايسته‌مييورم، ردّ ايدييورم. بنم حقّمده باشقه‌لرينڭ حسنِ ظنّنى قبول ايتمديگم حالده، هانگى قانون بنى مسئول ايدر كه· إختيارم و رضام خارجنده، باشقه‌سنڭ حسنِ ظنّيله بڭا إهانت ايديلييور. فرضِ محال اولارق، بو توجّهِ عامّه حقيقت ده اولسه· وطنه، ملّته فائده‌سى وار، ضررى اولماز. هم أگر، بر پارچه‌سنى بن ده قبول ايتسه‌م· بو إختيارلق، خسته‌لق، يوقسوللق و صوغوق بر اوطه ايچريسنده، دهشتلى بر حپسِ منفردده، ضرورى خدمتلريمى گورمك ايچون بر ايكى إنسانڭ دوستلغنى قبول ايتمكلگمده هانگى فنالق وار؟ هانگى قانون بونى منع ايدر؟ بر ايكى ايشجى چوجقدن باشقه‌سنى بنمله تماس ايتديرمه‌مك هانگى قانونله‌در؟ او ايشجى چوجقلر هر وقت بولونمديغى ايچون، كندم ايشمى گوره‌مييورم. بو دهشتلى وضعيتى، ألبته بو مملكتده إنضباط و حكومت و إداره آدملرى نظرِ أهمّيته آلمق بورجلريدر. جدًّا علاقه‌دار ايدر دييه سزه بيان ايدييورم.

أميرطاغنده بر تجريدِ مطلقده

سعيد النورسى

٭ ٭ ٭

﴿بِاسْمِهِ سُبْحَانَهُ﴾

چوق عزيز، صدّيق، بختيار قارداشلرم!

قيزيل روسيادن چيقه‌رق، قيزيل آتشلر، قيزيل قيغلجيملر صاچان و برر برر دنيا شهرينڭ محلّه‌لرينى صاران و اورالرى ياقوب قاووران، بعض يرلرده ده نفاق و شقاق آتشلرى صاچارق، قارداشنه"قارداشنى ئولدير" دييه باغيران و أڭ نهايتده عالمِ خرستيانيتى ياقوب، قاووروب، خرمان گبى صاووردقدن صوڭره عالمِ إسلام محلّه‌سنى صاران و أويمزڭ صاچاقلرينه قيغلجيملرى صيچرايان و چوق بيوك و چوق دهشتلى بر بلا اولان قومونيزم گبى عظيم بر يانغينه قارشى إطفائيه وظيفه‌سنى اوزرينه آلان رسالهِٔ نور، مسلمانلرڭ و بشرڭ أڭ بيوك و يگانه تحصّنگاهى و أڭ بيوك ملجئيدر.