أفنديلر! ضلالت و فنالقلر جهالتدن گلسه، دفع ايتمسى قولايدر. فقط فندن، علمدن گلن ضلالتڭ إزاله‌سى چوق مشكلدر. بو زمانده ضلالت فندن، علمدن گلديگى ايچون، آنجق اونلرى إزاله ايتمگه و نسلِ آتيدن او بلايه دوشن قسمنى قورتارمغه، قارشيلرنده طايانمغه رسالهِٔ نور گبى هر جهتله مكمّل بر أثر لازمدر. رسالهِٔ نورڭ بو قيمتده اولديغنه دليل شودر كه: يگرمى سنه‌دن بَرى، بنم شدّتلى و كثرتلى بولونان معارضلرم و شدّتلى طوقاتلرينى يين فيلسوفلرڭ هيچ بريسى، رسالهِٔ نوره قارشى چيقمامش و جرح ايده‌مه‌مش و چيقاماز. و طوقوز آى، اوچ عدليه و مركزِ حكومت أهلِ وقوفى، يوز كتابدن عبارت أجزالرنده، بزى مسئول ايده‌جك بر تك مادّه بولاماملريدر. و بيڭلر أهلِ دقّت اولان رسالهِٔ نور شاكردلرينه قناعتِ قطعيه ويرن، "إشاراتِ قرآنيه" و "إخباراتِ غيبيهِٔ عَلَويه و غوثيه"نڭ، بو عصرده رسالهِٔ نورڭ أهمّيتنه و مقبوليتنه إمضا باصمالريدر.

أوت عدليه‌لر حقوقلرى محافظه ايتمك و حقسزلرى تجاوزدن طورديرمق، وظيفه‌لرى اولمق جهتيله· رسالهِٔ نورڭ يوز رساله‌سى، يگرمى سنه‌ده يوز بيڭ آدمڭ سعادتلرينه خدمت ايتديگى ثابت اولمقله برابر· اون سنه‌دن بَرى، ايكى محكمه و مركزِ حكومت و بر قاچ ولايتڭ ضابطه‌لرى و دڭزلى محكمه‌سى مناسبتيله طوقوز آى بتون محرم و غيرِ محرم أوراقلريمزده و رساله‌لرده ملّته و وطنه بر ضررلى مادّه‌يى و موجبِ جزا بر ياڭليش گورمديگندن، ألبته رسالهِٔ نورڭ بو وطنده غايت كلّى و بيوك حقوقى وار. بو كلّى و چوق أهمّيتلى حقوقى نظره آلمايوب، عادى أوراقلر گبى مصادره ايده‌رك، ملّته و تقويهِٔ ايمانه محتاج بيچاره‌لره پك بيوك بر حقسزلغى نظره آلمامق و عادى بر آدمڭ جزئى و كوچك بر حقّنى أهمّيتله نظره آلمق· عدليه‌نڭ ماهيتنه و عدالتڭ حقيقتنه هيچ بر جهتله ياقيشماز، دييه سزه خاطرلاتييورز.